Nos por corda cu antes daknan di scol y algun cas na Aruba tabata traha di asbest. Pero pa mantene y despues di aña bah’e, tin su proceso y esey no ta facil. Segun Sylvio Werleman di DTI hopi hende no sa e procedura aki. DTI tin e informacionnan necesario riba www.gobierno.aw, caminda cu den e prome siman di December a saca e asbest regeling, cual DTI ta aplicando. Eyden ta haya tur e articulonan y e meldplicht ta wordo menciona den esey, pa laga DTI sa. DTI ta sali na vanguardia di personanan cu ta traha riba dje. Prome cu haci un trabao cu ta riesgoso, informa bo mes, prome cu bo tuma e paso pa baha materialnan cu ta contene asbest.
Tur hende por yama pa informa si enberdad esnan cu ta traha riba dak ta haciendo nan trabao. Por ehempel si un bisiña bisa cu na tal luga no tin siguridad, e ora sa caba cu nan ta ilegalmente bezig. Tur bisiña mester wordo informa un siman delanta prome cu baha e dak di asbest y DTI ta guia con pa haci’e.
E unico consecuencia ta cu DTI ta yega para trabao y esaki mester wordo obedeci. Hasta nan por yama polis y nan por sigui tira bista pa mira cu si en berdad nan ta tene e trabao plat te ora cu tur cos wordo coregi. Si tur cos ta in place, e ora nan por sigui cu e trabao.
Segun Werleman bahamento di un dak di asbest ta un responsabilidad. E mester wordo haci bon y safe. Tur hende cu ta bin den contact cu un dak di asbest, mester sa con pa handle e. Hasta esun cu ta transporte. Hasta companianan cu ta suministra e bakinan pa transporta, por pidi pa e permiso di DTI. DTI ta duna vergunning pa nan por haci e trabao di baha dak. Esey ta e prueba cu polis por yega puntra pe y cualkier hende y mustra cu en berdad nan a haya permiso di DTI pa baha e dak.
Asbest ta peligroso pa tanto trahado cu ta transporta e asbest, como tambe pa esun cu ta bahe. Tin un obligacion cu e asbest mester yega Parkietenbos. Serlimar tambe tin e derecho di nenga esaki. Si e no bin verpakt, manera cu e exigencia di Serlimar ta, nan por neng’e, te ora cu caba di empakete bon, ta acepta e asbest, pa hink’e den nan landfill.
DTI ta disponibel na Pos Chikito na 5845300, puntra pa afdeling cu ta handle cu e asbest y gustosamente DTI ta duna tur informacion cu nan tin cu tene cuenta cune.