Mervin Ras ta trese padilanti cu siman pasa a firma e documentonan cu Valero pa traspaso di e refineria y propiedadnan na pais Aruba. Aruba tabata spera esaki pa un tempo largo. Den e temporada aki tabatin diferente intento pa busca operadornan pa e refineria y tabatin diferente mocionnan presenta y aproba unanime den Parlamento. Wyatt-Ras semper a kere den un reapertura pa asina nos pais no mester depende solamente di un pilar so di nos economia cu ta nos turismo. Despues cu nos por a tende cu Gobierno lo yega na un acuerdo cu CITGO, tabatin hopi deliberacion y porfin a yega na otro. Oposicion kier haci awor comosifuera cu ta nan ta habri e refineria. Esaki no ta cuadra cu realidad. Gobierno den su intento pa un reapertura a nombra un comision di experto pa por dune conseho. Pero ta Gobierno ta esun responsabel den e caso aki pa yega na un acuerdo cu e diferente actornan, di tanto Valero como CITGO.
Mirando cu awor e proceso di firmamento cu CITGO y Valero ta cla, e ley lo mester bin Parlamento pa haya aprobacion y pa por inicia e Refineria di Aruba cu ta bay lease gran parti di e refineria cu CITGO.
Un di e exigencianan di Gobierno ta pa minimo di daño wordo causa na medio ambiente, door di cual e refineria mester draai riba gas. Wyatt-Ras ta spera cu pronto e ley por yega Parlamento pa wordo trata. E Parlamentario kier felicita Gobierno, e comision di profesionalnen cu a conseha Gobierno y henter nos pueblo pa e logro aki. Awor falta tratamento den Parlamento pa por wak precisamente kico e acuerdo ta encera. Wyatt-Ras ta indica cu apertura a lo largo lo duna mas di 2000 trahado un empleo, incluyendo esnan cu ta traha den contratista. Esaki sigur lo haci posibel cu nos hendenan lo tin un entrada mas sigur.