Dr. Arturo Vallejo, candidato ariba lista di partido Movimento Electoral di Pueblo, MEP, ta splica su punto di bista ariba salud di Aruba.
Salud na Aruba ta un preocupacion hopi grandi na Aruba. For di dia cu AZV a wordo implementa, e parti teorico tabata di berdad un plan hopi bunita. E tabata un plan di seguro general, unda tur hende tin derecho di yega na nan salud. Ariba papel esaki tabata sumamente bunita.
Pero despues di e tur e añanan, e desaroyonan, e caso awo cu nan ta enfrentando e realidad, cu tin retonan. No por papia cosnan solamente negativo di AZV, segun Dr. Vallejo, pero si e ta di acuerdo cu mester cambionan den AZV, cu mester reestructura e forma con ta pensa den AZV, bin cu solucionnan, bin cu plannan. Con por ta posibel cu den e utimo añanan, e ultimo desaroyonan, ta wak con e costonan di salubridad ta bay laira, sin cu ta bin cu cambionan, pero ta dicidi di cobra e pueblo mas placa. Esaki ta areanan di preocupacion.
Segun Dr. Vallejo, dicon no a introduci mentenan nobo, ideanan nobo, den e parti di e parti salubridad y servicio di AZV. Semper a keda e mesun hendenan den e poder, e herarchia di AZV. Dr. Vallejo lo kier wak caranan nobo, ideanan nobo, pensamentonan nobo. Con pa analisa y resolve problemanan cu AZV ta enfrentando aworaki. Den salubridad tin e modalidad di manda pashentnan afo. Ta mandando hopi pashent Colombia. Esaki no ta malo, e servicio di salubridad na Colombia ta hopi bon, pero pakico no busca manera pa bira mas fuerte na cas, pa e structura di medicina ta hipi mas fuerte na hospital. Hospital actualmente ta pasando den un fase di renobacion, cual ta hopi bon. Pero un edificio di 5 strea no ta mehora e servicio di salud. Dr. Vallejo ta kere mas den e parti di cu por flui cu hendenan nobo, cu capacidadnan nobo, mester cuminsa acepta Arubianonan cu ta specialisa den diferente area.
E servicio di AZV, e forma con mester afronta na dje, lo ta definitvamente den fase. Bo no por ta radical, unda cu lo bay corta e mandamento di pashent afo. Esaki mester bay den un fase di distribucion. Aworaki casi 62 miyon florin ta bay afo den cuido medico exterior y dicon no ta paga e placa aki na aruba mes? E ora e placa aki ta drei bek den economia. Awo ta mandando placa afor, placa cu nos lo no wak mas. Mester corda bon cu e clinicanan na Colombia, nan tambe ta funciona manera negoshi. Un di nan lema pa nan subsisti, ta pa cobra pa tur e servicionan pa Aruba. Hendenan cu a bay pa cirugia di wowo, na Colombia, nan no ta opera den e prome siman, pero si nan ta pasa check sanger y presion tur dia. Esaki cu e fondo su tras ta pa logra coba e pashent e siman cu tabata eynan. No tin mucho control den e facturacion, ken ta revisa tur e facturacion di e hospitalnan aki? Ken ta controla cuanto biaha e dokter ta controla e pashent, segun Dr. Vallejo. Esaki mester wordo controla enbes di saca y paga sin wak si ta pagando pa algo cu di berdad a haya.
Dr. Arthur Vallejo, si e haya e oportunidad di sinta como minister di Salubridad su tres puntonan unda e lo trece cambio den salubridad, e prome lo ta prevencion: e area di prevencion ta sumamente importante. Nos sistema ta uno curativo. Nos ta wareda te ora cu algo daña, nos tin un problema, e ora nos ta bay dokter pa busca e solucion con p dreche. Su di dos punto, ta e yiunan di tera, cualnan ta perlanan cu nos isla tin, cu nos no ta probechando di nan. Y esaki ta importante pa crea un sistema transparente, si e por ta desliga di gobierno, esaki lo ta hopi maraviyoso. Su di tres punto, un laboratorio kimico medico, cual ta necesario pa Aruba, pa por controla nos medicamentonan. Awendia tin hopi desconfiansa den e medicamentonan y na Aruba no tin un institucion pa controla kimicamente, si e pildo tin e cantidad di miligram, si e ta di bon calidad of di mal calidad. Tur pais tin esaki y dicon Aruba no tin esaki na 2017.
Tin hopi servicionan clinico cu por wordo haci akibou mes. E ta full un structura cu mester bin. Por logra haci esaki den diferente forma. Cumisna trece profesionalnan di afo, den areanan cu mas nos mester. Kisas si e areanan ta malesanan di curason, bin cu specialistanan den cada area. Dunanan un oportunidad pa desaroya esaki aki na Aruba. E otro forma ta, pa ta un tiki mas flexibel. Aworaki tin un monopolio, un solo hospital. Hopi poder centralisa den un solo institucion. Dicon no a probecha pa, enbes di haci un renovacion asina costoso na Hospital, pero dicon no a haci Imsan un berdadero hospital? E ora ey lo tabata tin dos , no solamente uno, pero dos instituto cu por duna servicio di hospital. Aworaki tur fondo, un biaha mas ta bay den un solo institucion. Esaki ta cosnan cu ta trece duda, inkietud, y awo si por tin dos, pakico ainda ta pump mas placa den uno solamente.
Dr. Vallejo a sigui bisa cu e parti di asesoria, e conseheronan, esey ta valioso. E team bo tras, cu ta conseha, cu ta bisa cu mester di mas oportunidad pa e Arubianonan, mester trece e cuido medico mas cerca di e comunidad. Si nan no ta haya loke nan mester den un institucion, nan ta bay na e otro. Esey ta importante, ta pa amplia e sistema.
Tur e ofertanan di afo, a yega na Clinica di Dr. Vallejo, con pa hiba hende Colombia pa tratamento medico. Dr. Vallejo a splica, cu Aruba tin e beachnan, e facilidad turistico, pakico no bira fuerte na cas, y trece hendenan di Venezuela, Merca of Colombia pa bin tratamento medico. Pero Aruba no ta cla pa esaki, y mester cuminsa bira fuerte akinan. Un caminda mester cuminsa y mester cuminsa pa bira mas fuerte akinan. Sea ta trece personanan di afo, of sea ta duna nos hendenan e oportunidad pa por logra habri clinica aki na Aruba. E ta un fase, e ta bay tuma tempo. E ta un sistema cu ta cera, e ta un sistema casi manera monopolio, un solo hospital cu hopi poder. E idea ta pa crea mas trabao, si bo tin dos clinica, bo tin mester di mas dokter. Aworaki tin un monopolio, caminda cu ta directiva ta limita e opcionnan di e dokter. Den nos sistema actual, e dokter su posibilidadnan ta limita den su trabao, y nan mester baha cabes, ya cu no tin otro opcion. Mientras cu si tin competencia, e dokter por bisa, cu e ta bay na e otro clinica, caminda e ta mas liber pa eherce su profesion y den su decisionnan. Y esey lo bay drecha e funcion di keda cla mas lihe cu’n afspraak cu dokter, haya e servicio manera desea. E ta duna e hendenan mas oportunidad, unda nan ta wordo atendi mas miho y unda e servicio ta wordo ofreci na un manera optimal, segun Dr. Vallejo.