Diamars mainta, Gobierno di Aruba, a yama un conferencia di prensa caminda a informa medionan di prensa presente relaciona cu e mal tempo na caminda. Prome Minister Mike Eman, hunto cu diferente director y representante di departamento y institutonan concerni, a duna informacion di e preparacionnan cu a haci caba, loke ta haciendo y tambe loke ta spera cu pueblo mester keda prepara pe.
DOW tabata hopi activo y a cuminsa cu limpiesa di rooinan, rioolering ta wordo limpia frecuentemente y semper 48 ora prome cu un mal tempo ta pronostica di yega, ta bolbe haci nan limpi pa sigura cu e tapanan ta habri pa permiti un bon fluho di awa. Tur otro ekipo, inclusive material pisa, Prome Minister mr. Mike Eman a bisa, a wordo revisa caba por si acaso nan mester bay den uzo.
Ing. Marlon Croes, director di Departamento di Obranan Publico (DOW), a bisa cu tur aña nan tin un plan di limpiesa cu ta wordo ehecuta prome cu e temporada di prome di Juni yega. A bin ta dedica basta tempo pa cambia operacion relaciona cu pasada di Bret, controlando e rooinan bek, baha nivel di awa den e “buffer” di areanan cu ta ricibi e fluho di awa. Tambe a controla cu tur canal y bocanan pa lama ta habri, finalisando cu control riba e roosternan den caya ayera. El a splica cu a laga e roosternan como ultimo pero tin hopi resto di sushi riba caminda y cualkier yobida lo hiba esaki den e rioolering (drenahe). Pesey ta limpia esaki den e 48 ora prome cu pasada di e mal tempo pa sigura cu e area ta limpi.
DOW ta preparando su ekipo cu den cualkier eventualidad lo wordo poni den 5 area: Bubali; Parkietenbos; Zeewijk; Warda di Polis Noord y Warda di Polis Santa Cruz. Esaki ta haci nan salida mas facil y rapido den caso di emergencia pa yega mas lihe na e sitio cu mester di ayudo. Pero tambe nan ta prepara pa una bes cu e mal tempo pasa, nan ta cla pa brinda e ayudo necesario.