DENVER, Merca- Dos ruman muhe, un di 5 aña y otro di solamente 3 luna edad a wordo rescata den e ciudad di Denver, Colorado. E rescate a wordo haci pa agentenan di FBI trahando undercover, durante un operacion grandi contra di traficantenan sexual cu a wordo lidera pa FBI, segun autoridadnan.
E supuesto traficante di mucha tabata un amigo di e famia di menor y el a comunica cu un agente undercover di FBI pa ofrec’e un acuerdo di 600 dollar pa bende e muchanan pa sex, segun FBI diabierna, ora di duna detayenan di e asina yama Cross Country XI operation.
Aunke e crimen aki ariba su mes ta suficiente pertubador, autoridadnan a bisa cu nan a rescata 82 mucha mas y tambe hobennan durante un entrada hudicial siman pasa. Cerca di 120 persona a wordo aresta.
A pesar di e cifranan aki, e trabao di FBI ta leu di caba.
“Lastimamente, e cantidad di traficantenan caputra y e cantidad di muchanan recupera ta reforsa e motibo pa kico mester sigui cu e trabao importante aki”, segun e director di FBI Christopher Wray.
Pa e muchanan aki, bida nunca mas lo ta mescos. Holly Gibbs, sobreviviente di e trafico sexual di mucha y Directora di Programa di Respuesta pa traficacion humano, a bisa cu e fenomeno aki “ta un crisis global di salud publico”.
“Loke e muchanan a pasa aden ta un tragedia y nan tin un caminda largo nan dilanti. Pero, pa aworaki mi ta contento cu nan ta safe”, el a bisa.
Fuente: http://cnnespanol.cnn.com