Solamente dentro di 24 ora, a fayece na Cali dos muhe di 34 y 53 aña, despues di a somete na procedimentonan estetico den centronan medico di e capital del Valle. Segun informacion di Caracol Radio, e muhe di 34 aña tabata Gloria Elena Moreno, kende tin un yiu di 12 aña. Moreno a somete su mes na un lipectomia of abdominoplastia den un clinica di e bario Tebol de Calo. E informe preliminar ta indica cu Gloria Elena Moreno a muri oranan despues di e cirugia.
E di dos victima tabata Jacqueline Bravo, di 53 aña, kende a wordo opera den e Clinica Orbes di e bario Tequendama zuid di Cali. Bravo tabata biba na Merca y tabata tin un centro di estetica na Manhattan. Segun autoridadnan di Cali, e muhe tabata kedando na un cas di reposo den e bario Tequendama y eynan nan a reporta di a sinti su mes “malo”, oranan despues, el a muri. Den e ultimo 30 dianan, autoridad di salud a reporta e fayecimento di 5 muhe despues di procedimentonan estetico.
Cerca di cuater persona ta muri pa aña na Cali despues di realisa un cirugia plastico estetico. Un cifra alarmante, teniendo na cuenta cu den e ultimo 17 aña, ta 65 persona cu a perde nan bida na Cali, segun un investigacion realisa pa dokternan di e Universidad Icesi, Manuela Galvis y Maria Paula Hormaza y e patologo Jorge Eduardo Paredes, na Augustus di aña pasa. Na 2017, sin embargo ya a kibra e marca. Pa loke ta e aña, ya a muri cinco muhe.
Dentro di e resultadonan di e investigacion, cu a wordo expni na e Congreso Nacional di Medicina Legal y Ciencianan Forense, nan a haya cu tabata tin pashent cu a practica te hasta shete intervencion den e mesun acto kirurgico. Tambe a registra fayecimento di dos menos di edad, esun di mas hoben, di solamente 16 aña.
Dentro di e cirugianan mas practica riba e personanan fayeci, ta haya liposuccion y e inyeccion di biopolimero den e chan chan y a evidencia cu e embolia di vet (obstruccion di un ader door di vet) y e hemoragianan, tabata e principal causanan di morto den e tipo di cirugianan asina. Mas di 50% di e mortonan a tuma luga den e prome 24 ora, ya sea durante of despues di e intervencion.
Cali, mescos cu Medellin, a converti den un centro importante pa e realisacion di cirugianan plastico na Colombia y mundo. Di e 65 caso di personanan cu a muri pa e causa na Cali, nuebe a bin for di exterior. Ta calcula cu den e pais aki ta realisa cada aña 200 mil cirugia plastico, di cual 16% ta wordo ehecuta den e capital del Valle.
Fuente: El Espectador