Parlamento a pasa dos leynan pa husticia importante entre otro core auto cu celular, pa cual Sra. drs. Mervin Wyatt- Ras ta splica.
Un di nan ta e ley, ta pa implementa diferente tratadonan, obligacionnan di tratadonan cu Parlamento tin. E ta un ley complica, pero cu toch mester cumpli cu nan. Y e otro e ta adaptacion di castigo, cu ta limita e persona e ora ey, ora cu tin un accidente y e persona cu a causa e accidente, manera sa pasa, ta gewoon bay for di e sitio. Pero esaki no ta posibel mas. E ley aki ta salvaguardia, cu e persona mester keda eynan pa e wordo investiga pa e wordo deteni pa asina investiga kico a pasa. Esey ta a base cu loke a pasa cu e Zinnia Croes, cu tabata envolvi den un accident y su famia no a keda para eynan. Nan a sigui cana nan caminda, nan a lanta un fundacion y nan ta haciendo un trabao. Nan bayendo na diferente instancianan pa asina busca nan derecho y ta bay tambe na Ministerio Publico. Den e ley akinan, tene cuenta cu e dolor di e famia pa sali na bienestar di otro victimanan cu por tin. Den e ley akinan ta bin un cambio pa loke ta trata e articulo cu ta concerni esaki, articulo 40 di e ley akinan. Por bisa cu a base di esaki, Sra. Wyatt a sigui splica cu dos amienda a wordo presenta door di fraccion di AVP y e tabata basa ariba e punto akinan, cu ora un accident sosode cu e persona no mag di bandona e sitio.
E otro amienda ta, pa ora cu bo ta core auto, bo no por ta na celular. A keda demostra cu esaki ta causa hopi accident. E leynan cu a wordo presenta diamars mainta, tambe a wordo aproba unanimamente door di Parlamento. E tabata un reunion hopi eficiente. Tur hende tabata corto y claro den nan puntonan, asina tambe minister Dowers.
Sra. drs. Mervin Wyatt- Ras ta hopi contento cu e ley aki a keda pasa, y esaki ta duna e entidadnan tambe e toolsnan pa traha ora di accidente, paso no mag di ta asina, cu no ta importa ken bo ta, ora bo ta envolvi den accident, bo mester para y carga responsabilidad. En especial tambe ora tin un persona mal herida y tin un persona cu ta perde su bida y esaki ta imposibel di tolera y cu awor e cambio a bin den e ley aki. Como parlamentario y ciudadano, pero como Presidente di Parlamento tambe mas contento ainda.
El a sinti e dolor cu e famia tabata tin, ora cu nan a trece e carta cerca dje, na Parlamento, cu nan no ta contento con nan a wordo trata door di instancianan, door di Ministerio Publico. Por ultimo Sra. drs. Mervin Wyatt- Ras a bisa, cu nan no por haci milager, pero e ley aki ta brinda oportunidad den otro casonan, caminda pa cana, pa bo derechonan wordo salvaguardia.