TORONTO, Canada- Dos avion a dal den otro riba e pista internacional di Toronto, Canada sin cu tabata tin herido. Pero si e impacto a ocasiona un candela chikito den un di e avionnan, cual a obliga e evacuacion di e pasaheronan.
E accidente a tuma luga ora cu e avion sin pasahero ni tripulante di e compania charter Sunwing, cu tabata wordo getouw pa e personal di e pista, a dal den un avion di WestJet cu a caba di aterisa, yegando for di Cancun, Mexico cu 168 pasahero y 6 tripulante abordo.
E impacto a provoca un candela chikito den e avion di Sunwing cu a obliga na evacua e pasaheronan di e Boeing 737-800 di WestJet.
Un di e pasaheronan a declara na un medio Canades cu despues di e susto di e impacto inicial, nan a biba momentonan di panico ora cu e avion di Sunweing a cuminsa perde combustibel cual a produci un incendio.
Despues di cu e candela a cuminsa, e pasaheronan di e avion di WestJet a wordo forsa pa scapa for di e avion usando e rampanan di emergencia.
E tareanan di evacuacion di e pasaheronan a wordo dificulta pa e condicionnan meteorlogico di Toronto, caminda cu na ora di e accidente e termometer tabata marca -20 grado Celcius, aunke cu tabata parce di -30 door di e biento.
Otro pasaheronan di e avion di WestJet a declara cu e evacuacion a wordo dificulta pa algun pasahero cu tabata sacando nan ekipahe di man.