Na honor di e celebracion di e 40 aniversario di Timeshare na Aruba, Aruba Timeshare Association (ATSA) a laga traha un rapport, cu data cu a wordo colecta den cabamento di 2017, pa asina duna un bista di e industria di timeshare riba nos isla. E rapport a wordo traha den colaboracion cu Aruba Tourism Authority (ATA), y a wordo prepara pa Universidad di Aruba (UA). Lo siguiente ta e di cinco di e seis articulonan, resumiendo e estudio.
Na honor di e celebracion di e 40 aniversario di Timeshare na Aruba, Aruba Timeshare Association (ATSA) a laga traha un rapport, cu data cu a wordo colecta den cabamento di 2017, pa asina duna un bista di e industria di timeshare riba nos isla. E rapport a wordo traha den colaboracion cu Aruba Tourism Authority (ATA), y a wordo prepara pa Universidad di Aruba (UA). Lo siguiente ta e di cinco di e seis articulonan, resumiendo e estudio.
RESUMEN DI E RESULTADONAN
E resultadonan di e estudio cu a wordo ehecuta pa por compila informacion, ta mustra cu e bishitantenan di timeshare na Aruba en general ta hopi satisfecho cu e producto timeshare y cu Aruba como destinacion. En general, e encuestadonan tabata Mericanonan di edad mas halto y tabata dividi entre hende homber y hende muher. E gran mayoria di e encuestadonan a wordo considera como Baby Boomers (mas di 90%), y aproximadamente 70% di nan ta gana mas cu $90,000. Mayoria di e encuestadonan di timeshare ta propietario di nan mesun timeshare (78.8%) y mayoria di e personanan a cumpra nan timeshare prome cu aña 2003 (46.1%) y a bishita nos isla mas di 10 biaha (68.1%). E encuestadonan aki generalmente tin un siman di timeshare (47.5%), y mayoria a paga menos di $15,000 pa e siman ey. E tarifanan di mantencion pa un siman di timeshare ownership ta un average di $1000 y tabatin tarifanan adicional pa mayoria di e encuestadonan di timeshare cu ta un average di $753 den dos aña.
Mayoria di e personanan no a intercambia ni tampoco cambia nan timeshare di Aruba y e rasonnan principal pakiko nan a cumpra na Aruba tabata paso nan a pensa cu Aruba ta un destinacion di calidad, e experiencia general di e hotel tabata excepcional, y e ambiente y atmosfera di e hotel tabata estupendo.
E compromiso cu e encuestadonan tabatin cu nan timeshare hotel tabata notabel. E gran mayoria di e encuestadonan di timeshare tabata extremadamente (56.2%) y hopi satisfecho (33.4%) cu nan compra mas recien di timeshare.
Un resultado interesante tabata cu den termino di importancia di e factornan di sales & marketing den e decison final di cumpra un timeshare na Aruba, loke a score mas halto tabata e bishitanan anterior na Aruba y e contacto directo cu representantenan di e hotel, pero e puntonan mas abao tabata travel agents, propaganda na television y e bishitanan anterior na Aruba riba barco crucero. Un sugerencia por ta pa enfoca riba pasaheronan di barco crucero cu un pakete di tour/actividad ora nan ta baha di barco pa mustra nan e balor di timeshare riba nos dushi isla. Mirando cu pasaheronan di barco tin tiki tempo na Aruba, creando un aventura unico pa nan por encurasha nan pa cumpra of intercambia na Aruba. Al respecto di e satisfaccion di compra mas recien di timeshare, mas di 75% di e encuestadonan ta extremadamente of hopi satisfecho. Menos di 1% di e encuestadonan tabata hopi of extremadamente insatisfecho cu nan compra di timeshare.
E gasto y e impacto economico ta dos factor positivo relaciona cu e industria di timeshare manera a wordo divulga den e estudio actual. E gasto total di e grupo di timeshare (average di 3.25 persona) durante full e biahe tabata un average di $3,723.56, sin mantencion of otro tarifanan di timeshare inclui, y e ta $4,723.56 pa grupo cu tarifa di mantencion den e gasto total. E areanan mas grandi di gasto di e encuestadonan tabata cuminda y bebida, ya cu e gastonan combina di cuminda y bebida (paden y pafo di hotel) tabata $399.56 pa persona of $1,298.25 pa grupo, pa biahe pa Aruba. E cantidad gasta na gamblemento tabata $217.26 pa persona, y shopping tabata $124.13 pa persona pa biahe. En general, e gasto di e individuo cu ta keda na un timeshare na Aruba di e estudio actual tabata mas di $1,422 cada uno. Ora di compara aña 2008 pa aña 2017, tabatin aproximadamente $4,419 gasta pa grupo pa vakantie den 2008, y $4,724 den 2017. (No inclui den e estudio ta – acomodacion, productonan Rubiano, joyeria y productonan di marca)
E impacto economico di e propietarionan di timeshare na Aruba tabata hopi bon. E balor economico bruto di e industria di timeshare di Aruba na 2017 ta wordo proyecta na $530 miyon. Esaki ta ekivalente na un tercer di e entrada bruto di turismo, y casi 20% di e GDP nominal proyecta pa 2017; ekivalente na un quinta di e produccion domestico bruto di Aruba.
Sinembargo, a wordo observa cu e producto di e industria di timeshare mester wordo actualisa pa asina por bai om na un manera adecua cu e propietarionan jong di timeshare global. E producto tabata existi na Aruba pa mas di 40 aña y di awo en adelante mester enfoca na mantene e tarifanan anual manera cu nan ta, mientras ta mehora e balor di e placa. En general, e encuestadonan tabata hopi satisfecho cu nan uzo mas recien di timesahre, y a demostra cu mas di 86% di e encuestadonan ta extremadamente of hopi satisfecho cu nan bishita mas recien. Mayoria di nan expectativanan a wordo cumpli cu e clima, e amabilidad di nos hendenan y e cualidad di nos beachnan a score mas halto den termino di a supera e expectativanan di cualidad. Esunnan cu a score mas abao tabata actividadnan tanto riba tera como riba awa,
transporte y trafico, excursion y tours, bida nocturno y entretenimento, cual por refleha e edad di e encuestadonan. Relaciona cu datonan demografico di e estudio y e diferencianan cu a ser haya, e resultadonan ta mustra cu e encuestadonan di mas edad tin intencionnan mas serio pa regresa, pero e satisfaccion general y e percepcion di e experiencia di timeshare ta menos compara cu e encuestadonan mas jong. Esaki por tin di haber cu e cantidad di biaha cu nan a bishita Aruba y posiblemente e ferfelamento of e monotonia cu nan por tin cu e opcionnan cu tin pa ofrece nan unabes nan yega cierto edad.
E encuestadonan cu entrada mas halto tin mas sentimentonan positivo di Aruba y e experiencia di timeshare, pero esaki por tin di haber cu nan por permiti nan mes experiencianan nobo y unico. Por ehempel, restaurantnan nobo, mas gamblemento y shopping.
Encuanto e datonan di gasto, hende homber ta gasta mas placa cu hende muher den tur categoria, excepto den gamblemento caminda cu no tin ningun diferencia significativo. Encuestadonan mas jong ta gasta mas placa na deporte acuatico, cu por ta relaciona cu nan capacidad pa participa den e actividadnan aki mas facilmente, y en general, e encuestadonan cu entrada mas halto ta gasta mas placa cu e encuestadonan cu menos entrada, locual tabata di spera.
E investigadornan a haya resultadonan general similar den e encuestanan di propietarionan di timeshare principalmente Estadounidense, Venezolanonan y personanan di otro lugarnan manera Canada y Reino Uni. E estudionan tabata anonimo y no a revela nomber di e timeshare hotel unda e encuestadonan a keda.