Sr. Donny Rasmijn a papia riba e tema di gobiernonan instabil cu ta tumando luga manera Corsou cu awe ya no tin gobierno mas y p’esey si wak Aruba nos gobierno ta uno stabiel.
Na Aruba, lo contrario ta pasando. For di 2001 te cu aworaki, gobernacionnan tabata stabiel y tabata tin continuacion den gobernacion. Esey kiermen cu un pais por wordo goberna na un manera stabiel. No ta bruha, siguramente, inversionistanan na nos pais. Cada persona di e pais, cu kier inverti. Ora tin gobierno instabil, e ta trece cun’e e peliger ey, cu bo no sa kico e gobierno ta bay haci.
Parlamentario di partido AVP, Sr. Donny Rasmijn a duna como ehempel, pais St. Maarten, tabata tin eleccion, pero e mesun anochi di resultado, ya caba tabata wordo bisa cu gobierno ta forma caba. Pero ni 48 ora despues, cosnan ta cambia, cu problemanan caminda miembronan cu no ta duna sosten, miembronan cu a caba di wordo eligi, sea ta bira miembro independiente, of nan ta bay sostene otro partido.
Esey ta trece cun’e, den un termino hopi cortico, e mesun gobierno cu tabata di wordo forma, no por wordo forma atrobe. Esaki ta procesonan cu ta sigui, y pa lunanan ta paisnan cu ta keda sin gobernacion. Na pais Corsou, durante IPKO, recien a cera conoci cu e gobierno nobo, ya awe Corsou no tin gobierno mas.
Sr. Rasmijn ta sigui bisa, cu un biaha mas, den termino di menos di 6 luna, un biaha mas tin eleccion na Corsou. Un politica instabil ta haci hopi daño na e credibilidad di e pais, y e confiansa cu e votadonan tin den politiconan. Cada biaha cu un gobierno wordo forma, ta haya cu e interes personal di cada politico, di cada persona cu ta den Parlamento, ta haci cu tin kiebro atrobe den gobernacion, pasobra no tin e mesun pensamento of ideologia, cu no ta mara nan na otro pa traha hunto.