Presidente electo di Merca, Donald Trump a priminti cu su ekipo lo tin un informe completo dentro di 90 dia riba e supuesto spionahe Ruso durante eleccionnan presidencial Mericano.
“Mi ekipo lo tin un informe completo riba pirateria den 90 dia”, e Republicano multimiyonario a skirbi riba su cuenta di Twitter. E tabata referi na e supuesto intervencion di Rusia den e eleccionnan di Merca y cu Moscu lo tin informacionnan riba su bida priva.
“Awo ta resulta cu e acusacionnan falso contra mi a wordo organisa pa opositornan politico y un spion fracasa cu tin miedo di wordo demanda”, asina Trump a skirbi riba rednan social.
Presidente electo diahuebs a adverti cu director nacional di inteligencia, James Clapper, a tilda e informe di ta falso y di cu Rusia tin informacionnan comprometedo di e magnate. Tambe el a adverti cu Rusia lo por purba na chantagea Trump durante su mandato.
Di su banda, Clapper a emiti un comunicado riba su combersacion cu Trump unda el a afirma cu el a informa Trump cu e informe ey no ta un producto di e servicionan di inteligencia di Merca. Asina mes, Clapper no a bisa na niun momento cu e informe lo por ta “falso”, manera Trump ta alega.
E informe, traha door di un ex spion Britanico y publica door di e web Buzzfeed, ta duna detayadamente e supuesto contactonan di Trump cu Kremlin, spionahe di Rusia riba e presidente electo y e posibilidad di cu e informacion ey por wordo uza pa chantahia Trump durante su presidencia.
Oficina di e presidente electo a nenga categoricamente e contenido y e veracidad di e informe.