Director di Elmar, Sr. Robert Henriquez, a splica rib’e situacion den cual algun trahador a para trabou y sali pa manifesta nan malcontento cu sosten di sindicato unda cu te hasta a bisa cu a secuestra un di nan colega.
Sr. Henriquez ta aclarea cu ningun momento a secuestra ningun trahador, sino cu a sinta hunto cu e trahador en cuestion pa haci preguntanan como parti di investigacion cu ta andando riba posibel iregularidadnan den e compania. E director di Elmar a encarga e compania Caribbean Forensic cu e investigacion pa e caso aki. E ta splica cu e trahado a mustra cooperacion pa cu e investigacion, cual a dura oranan largo dor di e varios preguntanan, pero cu ningun momento a secuestra y obliga e trahado contesta pregunta.
Di otro banda, e sindicato ta mustra cu autoridadnan concerni manera Landsrecherche por ehempel mester haci e investigacionnan y no un compania cu ta bin interoga un trahado. Segun Sr. Henriquez, como director, e mester percura pa tin pruebanan concreto prome cu e yega na un conclusion pa sa cua ta e siguiente pasonan cu e mester tuma pa e posibel iregularidadnan cu por ta andando.
Sr. Henriquez ta sigui splica cu e no a notifica e sindicato concerni y no ta pa regla cu e mester notifica nan. E mester notifica e Directiva y pone nan na altura di e situacion. Ademas, e ta aclarea cu mas di un trahado a wordo interoga caba y cu falta, pues e investigacion ta andando ainda.
Segun sr. Henriquez, e no ta compronde e motibo pa cual e trahadonan a sali expresa nan malcontento cu sosten di nan sindicato. Y pa loke ta e palabra cu a ser uza, cual ta “secuestro”, ta uno fuerte, incorecto y cu lo a trece un confusion grandi.