Ultimo wega di futbol a trece algun discusion unda cu team y fanaticonan no a keda contento con referee ta atende e weganan. Head of Referee, Oslin “Oshi” Kock a expresa cu AVB a duna e departamento di refereenan e autoridad pa nan mes scoge kende ta e refereenan pe weganan.
E apuntacion di refereenan no ta facil pasobra cada referee cu bay e wega, e departamento di referee ta asisti na cualkier di e weganan y ta evalua nan. Despues di e weganan ta tene un reunion y dialoga riba e wega y a base di e evaluacion, nan ta scoge ken pa manda pe siguiente wega.
“Nos no ta yega apunta un referee sin mas. Si tin algo manera den e caso di Division di Honor cu nos ta haciendo cada wega cu finalisa nos ta sinta cu nan y haci evaluacion cu e 8 refereenan cu a participa den e play-off”, asina Oslin Kock a remarca. Nan ta reuni desde 7:00pm-11:00pm y repasa e diferente hugadanan y analisa kico a haci den e wega, kico mester coregi. E no ta un cos cu nan ta yega dicidi ken ta fluit pero a base di loke cada ken ta haci riba veld ta scoge e refereenan. E departamento di referee ta sinta analisa y pensa hopi prome cu scoge.
Loke cu Oslin Kock ta bisa e refereenan ta pa no sigui loke ta skirbi riba Facebook, pasobra na momento di reunion nan ta trata tur loke tin di haber cu referee. “Rond mundo tur hende sa, fanaticonan no ta contento. Sea gana of perde nan no ta contento, semper nan ta culpa referee”, Oslin Kock a remarca. Referee no ta esun cu ta score gol pero nan ta ey pa dirigi e wega y pa garantisa cu ta aplica reglanan di e wega. Fanatico y dirigentenan no ta contento cu e decision pero na final decision di referee ta conta.
Un di e kehonan tambe ta e tempo adicional duna pasobra nan ta haya cu esaki ta hopi. Pero esaki ta bin cu nan tin cu pone e tempo di cambio of ora cu un hungado cay, nan tin cu acumula tur esey. E teamnan ta haya 90 minuut pa hunga y den e minuutnan ey nan tin hopi tempo pa anota. Pero na final di dia semper nan ta culpa refereenan pe extra tempo, asina Oshi Kock a termina splicando.
Ta bon pa bisa acerca cu e refereenan di Aruba ta ricibi cursonan constantemente, no solamente local pero tambe di profesionalnan di CONCACAF y di FIFA cu regularmente ta na Aruba pa brinda cursonan di capacitacion y pa nos refereenan actualisa nan conocemento di e reglanan vigente di wega. Aruba ta conta cu un FIFA Referee, den persona di Ricangel Deleca y 3 Assistant Referee di FIFA. Ta apunta e grupo aki constantemente pa dirigi weganan importante internacional. No mas cu den e siguiente dianan tanto Ricangel Deleca como Eugene Faro ta biaha pa Martinique pa dirigi e wega final di CFU. Di e forma aki por mira cu nos refereenan ta na nivel internacional y capaz pa dirigi weganan di taya!
Arubaanse Voetbal Bond ta contento tambe di anuncia cu tin 4 referee di Aruba cu ta nomina pa forma parti di e campeonato di CONCACAF U-15 Boys Championship, cu lo tuma luga proximamente na Bradenton, Florida na Merca entre 13 pa 19 di augustus 2017. Esaki ta un programa special, den cual ta eleva e nivel di e refereenan di Aruba ainda mas, ganando mas experencia internacional.