Durante e ultimo aña 7, Departamento di Agricultura, Cria y Pesca a sondea sistemanan mas moderno, pa por acumula dato y asina motiva productornan den uso di sistemanan mas modernisa den nan cunucu of hofi. Esaki a logra capta e interes di varios otro instancia, incluyendo TNO como tambe representantenan di islanan den regio.
Recientemente, Santa Rosa tabata tin e placer di ricibi bishita di Sra. Rolanda Hellburg-Makaai, Diputado pa e isla di Boneiro pa locual ta trata Sector Primario. Sra. Hellburg-Makaai a wordo acompaña pa un delegacion di ehecutivonan di Gobierno como tambe representantenan di TNO Caribbean y TNO Aruba.
Durante nan bishita, Sra. Nathalie Maduro, Directora di Santa Rosa y Sr. Rene Donata, hurista pa e Departamento a reuni cu e delegacion y durante un combersacion ameno, a discuti e diferente posibilidadnan pa por establece un relacion mas estrecho di informacion cu DLVV Boneiro y DLVV Aruba. Tambe a papia referente e strategianan cu por traha pa ambos isla y con por sostene otro tambe cu por ehempel intercambio di producto y cria y informacion di proyectonan pertenente na e Seccion di Pesca.
Pa loke ta trata e proyectonan mas grandi, nan a haci un recorido chikito den Santa Rosa, caminda nan por a mira con e trabounan ta bayendo na e insfractructura hidroponico y den e Seccion di Horticultura. Mester remarca cu e delegadonan a keda sumamente impresiona cu e diferente strategianan cu ta wordo ehecuta na Santa Rosa pa locual ta trata e parti di estudio y implementación di maneho como tambe e diferente ekipo, material, calidad di cria etc cu Santa Rosa ta brinda na e productornan local di Aruba.
Ta spera cu den un tempo corto e respresentantenan di e LVV nan di tanto Boneiro, Corsou y Aruba lo por reuni pa wak con por crea un plataforma educativo cu lo por traha mas di cerca cu otro.