Diputado Nina den Heyer, encarga cu, entre otro, Asuntonan Social na Boneiro, tabata di bishita na Aruba pa celebracionnan di himno y Bandera na Aruba. Durante su bishita el a probecha pa tene diferente reunionnan relaciona cu su trabounan na Boneiro.
Un di e reunionnan aki tabata dialuna mainta cu funcionarionan Servicio Pa Comunidad y Bario (antes BoBario) na MFA Noord. Sra. Heyer a splica cu nan tambe ta trahando riba un plan pa barionan di Boneiro y tabata kier a scucha di e experiencia extenso cu Aruba tin riba e tereno aki, con a inicia cu e trabounan te na con a desaroya esaki cu un resultado sumamente exitoso na Aruba.
E reunion a tuma luga cu Ruth Tromp-Schoop, Jacky Agunbero y Raoul Gravenstijn di Departamento Servicio Pa Comunidad y Bario (SCB), kendenan a duna diputado Den Heyer un presentacion detaya di nan trabounan na Aruba. Sra. Van Heyer su cartera como diputado ta encera diferente cartera, entre nan Asuntonan Social, Enseñansa, Asuntonan Huridico y Vivienda Popular. El a splica cu su bishita tabata un bon momento pa topa cu e funcionarionan di BoBario. “Mi a keda hopi impresiona, mas di scucha con basico nan a cuminsa y con grandi nan ta awor. E ta un inspiracion,” e diputado a expresa. El a agrega cu “sigur loke cu nos a siña aki na Aruba ta un experencia pa nos y mi por bisa hasta e ta algo cu nos por incorpora Boneiro, kisas den e plan pa cu barionan,” e mandatario a expresa di un forma hopi contento cu resultado di su encuentronan aki na Aruba.
Despues di a reuni cu manager di MFA Noord, Richard Tromp, e grupo a bishita e mini cancha deportivo na Madiki, unda cu diputado den Heyer a haya un miho bista di loke SCB ta haci den practica pa e barionan, basa riba e vision di Prome Minister Mike Eman y su Gabinete.
Durante e encuentro mainta tempran na MFA Noord, Sr. Tromp, a splica tambe con un edificio manera MFA ta sirbi comunidad. Principalmente a duna un splicacion di tur e servicionan importante cu por wordo ofreci den un solo edificio, den un area central. “Nos a intercambia idea y a duna sugerencia riba un producto pa duna un bon servicio na comunidad. E Diputado a keda encanta cu e vision tras di un edificio MFA,” Tromp a duna di conoce.
Diputado den Heyer despues di e reunion, a sigui bishita diferente otro proyecto di BoBario hunto cu funcionarionan di SCB.