DIP ta stimula traspaso dentro di famia. Esey ta un posibilidad y e otro posibilidad ta cu lo bay cuminsa cu e proceso di inventarisa tur tereno cu no ta den uzo, of cu si tin un construccion, pero no a wordo finaliza, pa asina cuminsa e proceso pa termina e erfpacht di e terenonan ey pa pasanan bek pa gobierno.
Hunto cu e hecho cu ta duna posibilidad pa haci e traspaso, esaki ta limita na famia. Den diferente bario tin un of dos tereno cu fundeshi pasa, of te na ringbalk, y yena cu mondi, cu a hasta bira luga pa tira sushi di e bario mes, Sr. Sjak Sie a bisa cu nan lo bin cu maneho cu e terenonan sea ta wordo traspasa of gobierno lo kita nan, pa por cumpli cu e demanda cu tin.
E yamada ta pa tur esunnan cu tin erfpacht, pa resolve e problema aki, pa cumpli cu e meta pa cual e erfpacht a wordo duna. Na prome luga cu enberdad e construccion ta tuma luga y bo por yega na bo cas. P’esey ta haci un apelacion na tur hende pa cumpli pa e reglanan. E reglanan awo ta mas streng ya cu ta trata pa resolve e problemanan cu tin cu terenonan sin construccion ariba dje. Esaki legalmente ta permiti. Tin dos posibilidad, cual ta cu gobierno por termina e derecho di erfpacht of e derecho di erfpacht por caduca. Tin dos procedura cu gobierno por sigui, pero pa ley ta posibel pa termina e derecho di erfpacht, si e persona cu tin’e no ta cumpli cu e condicionnan di erfpacht. Sr. Errol Shak Sjie, di Management Team di DIP ta amplia mas ariba esaki.
Fuera di e condicionnan di construi, tambe tin e condicion di paga bo erfpacht tur aña tambe. Esey tambe ta un condicion pa gobierno tuma medida. Primordial ta pa e construccion tuma luga riba e tereno. Pa loke ta e terenonan comercial, esakinan tambe DIP lo haci un sondeo di nan. E tereno erfpacht pa comercio, nan tin un otro procedura. Un procedura cu pa ley ta e procedura di opcion, cu den e periodo ey caba, mester cuminsa paga.
Pa haya un optie pa un tereno comercial, mester cumpli cu cierto condicionnan, prome cu e tereno erfpacht wordo otorga. Fuera di esey, pa e tereno comercial, pa bo haya e tereno mester entrega un carta di garantie di 10% di inversion cu e comerciante ta bay haci, cu asina gobierno tin posibilidad di cobra e placa ey, of pa haya e tereno bek den caso di incumplimento.
No obstante esey, tin di bisa cu eynan tameb tin diferente problematica entre otro cu no ta cumpli cu e condicionnan of traspaso ta tuma luga contra di e reglanan. Eynan tambe ta prohibi pa haci traspaso of bende e tereno, sin cumpli cu e condicionnan, segun Sr. Errol Shak Sjie, di e Management Team di DIP.