Diadomingo mainta cientos di persona a uni na Cas di Cultura pa asina mustra nan sosten abiertamente na e plataforma politico nobo, na e plataforma di union, na E Forsa Nobo, Pueblo Orguyoso y Respeta.
E sala di Cas di Cultura tabata completamente yen unda cu a funda oficialmente e partido cu lo representa e Forsa Nobo di Aruba.
Ruben Garcia tabata e maestro di ceremonia, mientras cu Sashah Figueroa a interpreta nos himno Aruba Dushi Tera y a deleita esnan presente cu e cantica “Que Bonita es esta Vida” y Rosabelle Illes a inspira sala cu su declamacionnan tan gusta.
E candidatonan a wordo introduci pa personanan reconoci riba tereno na nos isla y a sa di presenta nan meta y vision pa Aruba, cada un den nan ramo. Jacqueline van Putten a wordo presenta pa Renato van Putten y su area ta deporte. Joselin Croes a wordo presenta pa Stephen Daal y e ta concentra riba imigracion, Michella Steenvoorde Lacle a wordo presenta pa Diana Croes y su enfoke ta enseñansa.
Den un forma hopi ameno e tres miembronan di POR a presenta nan respectivo enfoke.
Siguientmente Dello Gomez tabatin e placer di presenta Andin Bikker, kende a mustra esnan presente cu pa logra realmente e metanan pa traha pa Aruba y realiza e plannan y visionnan pa nos isla mester traha uni, mester bin cu union y asina logra yega na gobernacion pa ehecuta esakinan.
Lisette Chung, casa di Otmar Oduber ta e persona cu a introduci Otmar Oduber, mientras cu su yiunan den exterior Jeandrick y Dana a manda un mensahe di video pa nan tata dunand’e sosten total. Prome cu Otmar a subi stage, un di su yiunan na Aruba, Sean a subi escenario y a bisa tur hende con orguyoso e ta di su tata.
Otmar a gradici tur esnan presente y tur esnan cu a uni nan mes na E Forsa Nobo y despues a concentra su mes riba loke POR ta bay ofrece na Aruba, un politica diferente, transparente, progresista, envolviendo pueblo y promoviendo nos hubentud, entre varios otro punto.
Tambe el a presenta un miembro nobo di POR cu ta cla pa sirbi Aruba, Ronny Maduro.
Despues a sigui e momento culminante unda cu notario Ralph Yarzagaray a funda oficialmente e plataforma politico nobo Pueblo Orguyoso y Respeta, POR.
Sin duda un mainta cu hopi emocion, positivismo, unda por a sinti e deseo y anhelo di esnan presente pa un cambio real, unda cu pueblo di Aruba por haya e oportunidad di wordo representa dignamente como un Pueblo Orguyoso y Respeta.