Dialuna mainta pa merdia a tuma luga un reunion importante di tur departamento cu tin di haber cu emergencia pa asina prepara e plan di accion. Si den e caso nos haya un mal tempo.diamars den dia tur departamento lo tin cu organisa nan mes y lo warda te cu merdia ora cu e Hurricane Hunter caba di bula den e tempo MATTHEW pa haya sa kico ta e direccion cu e lo hiba.
Si den caso yega cu mester sali informa pueblo, esaki lo ser yama pa meteo Aruba hunto cu minister di asunto general, pa asina por informa e comunidad di esaki di e pasonan cu mester tuma.
Awor ta keda pa tur hende ta pendiente pa e proximo oranan nos dilanti pa haya sa kico lo bay ta e desaroyo di e tempo aki cu ta drentando den Caribe.
Synopsis update
Te asina leu e disturbio tabata localisa mas of menos 475 miya oost zuidoost di Barbados diamars mainta y ta moviendo west riba un velocidad di 15 pa 20 miya pa ora.
Segun Hurricane Center, awasero y tormentanan asocia cu e sistema ta continua ta mustra mas organisa y si e trend aki continua, un depresion of tormenta tropical por forma mas laat durante dia.
Sinembargo pa 7’or di awe mainta, e sistema ainda tabata mustra di tin un centro cera di circulacion, segun pronostico.
Manera ya indica den e articulo aki un avion di reconocimento (Hurricane Hunter), ta programa pa tira un bista mas di cerca na e sistema aki durante oranan di merdia.
Tormenta nombra of no, awasero pisa y bientonan te na un forma di tormenta tropica lo ta posibel pa e islanan oost di Caribe y tambe parti di e islanan di Antias Menor (ABC) cuminsando awe nochi y sigui te den diaranson.
Ta adverti paisnan den Caribe oriental y central y e costa norte di Sur America pa tira un bista riba e sisema, ya cu “advertencia y vigilancia por wordo rekeri na cualkier momento.”
Un tormenta tin un circulacion defini y cera y bientonan te por lo menos 39 miya pa ora pa wordo considera como un tormenta tropical y haya un nomber. E siguiente nomber riba e lista ta Matthew.
Modelonan di computer ta mustra cu e sistema aki ta mantene su mes riba un trayecto west den Caribe, despues ta sugeri cu e tormenta lo haci un birada skerpi bay ariba nort y riba Hispaniola. Sinembargo, modelonan tin basta dificultad pa pronostica e trayecto di un tormenta cu no a forma su mes completamente.