otmarod
Minister Otmar Oduber for di inicio a mustra di tin hopi atencion pa distrito di San Nicolas.  Diferente proyecto el a hiba pa San Nicolas y awe por mira su frutonan tambe, mientras cu tin diferente otro na caminda, manera e ‘Community Museum’ y e tourbusnan cu lo bin pa cubri unicamente e ruta di San Nicolas.Ademas di esey, dialuna awor, 4 di maart,  Minister Oduber lo inaugura dos oficina nobo na e edificio di Arubus, cu sigur lo ta un ventaha hopi grandi pa tur esnan cu ta biba na e parti pariba di nos isla. Ta trata aki di un oficina di Departamento di Labor y Investigacion (DAO) y un otro di Departamento di Progreso Laboral (DPL).  E dos departamentonan aki lo ta situa den edificio di Arubus cu lo brinda e servicio compelto mescos cu ta haye na Seroe Blanco y Eagle.
Mirando cu tin hopi persona cu ta forma parti di nos forsa laboral ta biba pariba di nos isla, Minister Otmar Oduber cu sosten di Minister di Finanzas y Promer Minister, a bin cu e idea pa facilita esnan di pariba di nos isla cu e servicionan cu e dos departamentonan aki ta ofrece, manera informacion pa trabou y haya informacion y conseho riba nan derechonan.
Asina dialuna awor pueblo di San Nicolas y vecindario por conta cu servicionan completo cu DAO y DPL ta ofrece pa yudanan den nan desaroyo laboral.