Trahadonan di DVG a bay den accion dialuna ya cu nan a demostra nan malcontento pa cu e resultado di corte y nan no kier pa e director Sr. Jeff Starring na pia di trabao. Sr. Dangui Oduber, minister di Salud Publico ta splica kico ta e siguiente pasonan.
E trahadonan di DVG pa un tempo caba ta den un incertidumbre, pa cual a duna e director un prohibicion di entrada, mirando cuanto keho a keda entrega contra di su persona. Diferente keho a bin dilanti pa cu su maneho. E minister a haya necesario pa haci un investigacion a raiz di e hechonan cu a wordo treci dilanti. E director no a keda mucho contento cu e paso tuma y a entama un caso.
E motibo pa cual a duna e director prohibicion di entrada, ta pa motibo cu no tabata tin trankilidad . Pero den e ultimo simannan aki cu e director tabata ausente, e trahadonan por a funciona na un manera trankilo. Y a anticipa caba mirando e sentencia di hues ultimo pa cual a anticipa e reaccion di e trahadonan, cual a wordo confirma dialuna.
Tin un malcontento grandi, e trahadonan a manifesta esaki dialuna ora cu nan a manifesta nan malcontento. E trahadonan simplemente no ta bay acepta e trato di e director y den e manifesto nan a pone hopi cla cu nan ta pidi encarecidamente pa e director no presenta na trabao. Pa duna espacio na e comision di doorlichting pa haci investigacion. Unabes e resultadonan aki ta conoci, e ora logicamente lo mester tuma un decision di kico lo bira e futuro di Sr. Starring na DVG.
Ta lamenta e situacion cu ta den, ya cu no solamente e minister no tin confiansa mas den e director, mirando cu despues a manda un carta dirigi personalmente pa e director, y esaki a sali publica den medionan. Esaki sigur ta un muestra mas di desconfiansa, ya cu cartanan ta sali den medio. Esaki tambe ta pone cu e trahadonan tampoco no kier Sr. Starring na trabao, y si esaki pasa toch, nan lo exigi pa e tuma su retiro.
E minister a sinta cu e director, a splik’e kico ta e situacion y a pidi’e pa su cooperacion pa seis siman, pa investiga e kehonan. Sr. Starring a sali for di e oficina y un rato despues e mandatario ta haya un carta cu e ta entama un caso contra di e mandatario. Y esaki ta un otro prueba mas cu Sr. Starring no ta di confia.
MANAGEMENT TEAM
Na final di dia, e sentencia di hues, e hues a duna e veredicto diabierna ultimo. E veredicto ta bisa cu Sr. Starring lo mester presenta bek na trabao y hunto cu su conseheronan huridico, ta evaluando kico ta e miho decision por tuma den e caso aki. E mandatario no kier delanta ariba e decision cu kier tuma. Esey ta un di e decision cu e por tuma. E por bay resorta bou di e Management Team, pero e no tin e tekenbevoegdheid mas como director. E Management Team a haya un extension di 6 siman mas, mirando e sentencia di diabierna ultimo. Hues no a tuma den consideracion niun di e argumentonan cu e abogadonan a trece dilanti.
Ta lamentabel cu no tin trankilidad den e departamento. Tin un incertidumbre enorme. E trahadonan no kier traha cu e director mas. Y dificilmente un director por sigui na e departamento unda e trahadonan no kier e. Ta un gran cantidad di trahado a sali pafo y demostra nan disgusto. E manifiesto ta papia pa su mes. Y pa diahuebs esunnan cu a entrega e manifiesto lo kier un contesta.
SENTENCIA
Den e sentencia ta poni cu Sr. Starring mester ta na trabao bek. Pero den e sentencia hues no a pone specificamente cu e presenta na trabao y eherce su funcion di director. Pero e mandatario a tuma e decision di dun’e un funcion temporal, riba e nivel di director, como beleidsmedewerker. Pero por a compronde caba cu Sr. Starring no a keda contento cu esaki y cu e lo entama un otro caso. Faltando algun siman pa e investigacion termina, por institui Sr. Starring como Management Team y por pone Sr. Starring den dje. Pero lo mester wak si di berdad e ta bay lanta un otro caso y lo sigui warda ariba e sentencia di hues. Ta sitaucionnan fastioso cu e mandatario ta purba di evita. E trahadonan ta para firme. E maltrato cu nan a haya e ultimo añanan, nan no ta acepta mas. Nan a cansa di intimidacion, di maltrato. Nan a bira victima di e trato cu e director a dunanan. Simplemente nan no lo acepta nan director mas di DVG. Consecuentemente lo mester fiha un posicion final, pero ta warda wak si Sr. Starring ta bolbe entama otro caso. A para bira cu practicamente cu hues a bira gobierno.
DIFERENCIA DI OPINION
Tin un diferencia di opinion entre esunnan cu a entrega e manifiesto y DRH. Ta lamenta e posicion di DRH, ya cu a inclui nan den e Voorlichtings Commisie. Pero nan a informa di no kier ta participe mas den e Voorlichtings Commissie. E mandatario tabata kier un partido imparcial, ya cu como partido imparcial, DRH por a yuda den e investigacion den e funcionamiento di e director. Pero despues di e accion di protesta di e trahadonan di DVG, DRH a informa e mandatario cu nan no ta interesa mas pa forma parti di e Voorlichtings Commissie, cual e mandatario ta lamenta.