Diadomingo 28 di augustus ta recorda cu 5 aña pasa den un Congreso extraordinario na Westin Hotel partido MEP a eligi su lider nobo, esta sra. Evelyn Wever-Croes. Riba e dia aki tabata tin 3 candidato cu a ser postula pa eleccion di lider y den un forma democratico cu semper a caracterisa partido MEP, sra. Wever-Croes a logra haya e gran mayoria di voto di e lidernan di bario pa ocupa e funcion tan importante aki.
Cu e eleccion aki sra. Wever-Croes a tuma liderasgo di partido MEP for di sr. Nelson Oduber, kende durante e Congreso 2011 a ser nombra como lider honorario di nos partido.
Sra. Evelyn Wever-Croes a haci su debut riba lista di MEP na e eleccion di September 2009 y a ricibi 1621 voto. Den e siguiente eleccion na September 2013 nos lider a sa di redobla su cantidad di votonan y a ricibi 3396 voto.
Sin duda cu sra. Evelyn Wever-Croes durante e ultimo 5 añanan a haci un tremendo trabao como lider di MEP. Su sinceridad, honestidad, integridad y capacidad ta virtudnan importante y ta muestra di e confiansa incondicional cu henter partido tin den su persona.
Pabien, lider Evelyn cu bo prome lustro como lider di MEP y sigui cu bo excelente trabao na bienestar di henter nos comunidad!