Diabierna subcontratistanan trahando den CITGO a haya cu nan cu e sorpresa cu nan badge a keda desactiva. Sr. Hubert Dirks di FTA ta amplia mas ariba esaki.
Tres sindicato, IOUWA, FTA y STA a reuni cu’n coordinador di minister Glenbert Croes. E idea tabata ta pa nan a haya un update di parti di IOWA, kico ta e situacion. Di parti di IOUWA tabata tin dificultad pa haya informacion. Tur cos ta indica cu e problema ta sinta na nivelnan di mas halto. Pero aki na Aruba, nos leynan mester wordo respeta. Sin importa kico pasa cu e proceso pa e reapertura di refineria. E trabaonan sea ta slow down, nan ta para of nan ta continua, e leynan cu tin aki mester wordo respeta. Y cualkier compania cu bin di afo, por ta CITGO, e por ta un otro compania, e mester respeta e leynan di akinan.
Loke ta fastioso ta cu nos ta biba di rumornan, aunke di parti di IOUWA mes, e speransa t’ey semper y ainda, cu e trahadonan specialisa den area ta bisa cu tin tur posibilidad cu e compania start up bek, sigur esey tin su gastonan. Pero aworaki ta asina cu, tin un situacion cu ta mustra cu e ta un strategia, un posicion cu CITGO ta tuma, cu sindicatonan no sa kico tin su tras. Esey ta haci cu mester yama esunnan cu si tin e informacion, cu ta RDA y CITGO bin na mesa y duna informacion. Esey sindicatonan mester por haci’e, no solamente pa loke ta miembronan di IOUWA, pero ta papia di derecho di trahado pero e forma di comporta di e dunado di trabao y den e caso aki ta un multinational. Esey di parti di gobierno tambe, segun FTA, mester para ariba e mesun punto aki, pa exigi claridad pa nos leynan wordo respeta.
Anteriormetne, minister di Labor, Sr. Glenbert Croes, a enfatiza cu niun di e contratistanan cu ta traha cu/den CITGO, lo haya permiso pa retira e trahadonan. No ta asina no mas, cu bo por kita un trahado for di e trabao, ya cu mester cana su proceso. Pero diabierna ta lanta cu e sorpresa, caminda cu 50 trahado, (sub) contratista ta bin haya e sorpresa cu nan badge pa drenta a wordo desactiva. Pregunta ta keda, si e companianan aki a cana e caminda legal pa pidi retiro di e trahadonan aki.
Sr. Dirks a enfatiza cu aki na Aruba nos ta, cu nos tin nos leynan, nos no ta na Merca y tampoco Venezuela. Mester haya claridad di kico e proceso aki, den ki direccion nos ta bay. Sindicatonan mester haya claridad ariba esaki. No por tin retiro asina no mas, y si tin retiro mes, esaki tin consecuencianan cu e trahado no por carga.
Mayoria di e trahadonan den refineria ta stranhero y dependiendo di specialismo di cada trahado, mester duna e prioridad na e trahado local. No por ta asina cu trahado local ta bay cas y e stranhero ta keda traha. Pero mester midi’e si, basa ariba e specialismo, e profesionalismo cu tin cerca cada trahado, di kico ta e trabaonan cu tin actualmente. Si ta carga speransa cu por sali for di e situacion aki, pero awo ta bay confronta e berdad.
Dialuna merdia sindicatonan lo reuni cu mediador di gobierno, Sr. Anselmo Pontilius pa pidi’e su envolvimento unda cu lo forsa pa trece e berdad na mesa for di esunnan cu tin e informacion aki, segun Sr. Hubert Dirks, lider di sindicato FTA.