Den tur skina di nos isla, celebracion di Dia di Himno y Bandera a tuma luga caminda a bolbe resalta e union den henter pueblo caminda no solamente nos pueblo a mustra su orguyo grandi pa su isla, pero na mes momento a brinda oportunidad pa nos propio hendenan probecha di oportunidad cu e celebracion aki a trece cun’e.
“For di diabierna atardi 17 di Maart, diferente actividad a marca inicio di e gran celebracion nacional aki, caminda entre otro a rindi homenahe na algun figura grandi di Aruba su cultura, entre nan Padu del Caribe, Rufo Wever y Hubert Booi, cu’n momento cu a haya gran acogida y admiracion cerca nos hendenan cu a keda sumamente contento cu e monumento di reconocimento aki. Awe cu orguyo nos por mira un joya di monumento den nos Plasa Padu.
E mesun anochi aki a duna reconocimento na e gran carera di otro musico masha stima den nos pueblo, esta Etty Toppenberg kende tur diabierna anochi na e Plasa dilanti di Djispi’s Place, ta deleita tur hende cu su musica unico y alegre y cu Gobierno a dicidi di duna un reconocimento special e anochi di 17 di Maart ultimo.
Fuera di e dos actividadnan aki, e fiesta cultural despues a sigui riba Plasa Daniel Leo cu’n concierto cu bandanan local cu tambe a wordo bon asisti y a cay na agrado di nos hendenan.
Diasabra dia di Himno y Bandera tur caminda por a nota con pueblo tabata asisti na actividadnan cu a wordo organisa den practicamente tur bario rond Aruba, caminda hopi organisacion, scolnan cu nan studiantenan y famianan riba nan mes, a probecha pa bende cuminda of cos dushi local pa asina haya fondo necesario pa asina sigui sirbi nan interesnan.
Diadomingo e celebracion a sigui na algun otro sitio mas pero sin duda nos por papia di un celebracion di tres dia continuo, di nos Himno y Bandera caminda e union nacional a resalta un biaha mas y nos hendenan mes a sostene otro dor di asisti na e eventonan organisa y asina percura pa asina nos hendenan saca probecho for di e gran celebracion aki,Parlamentario Jeffrey Kelly di fraccion di AVP ta mustra.