Dia 26 di juni 2017 ta un dia unda nos ta para keto y refleha riba un tema hopi importante den nos comunidad y rond mundo. Dia Internacional di Abuso di Droga y Traficacion Ilicito ta un dia cu pa hopi aña caba ta haya atencion. Tur aña Nationan Uni tin un tema riba e dia aki y e aña aki e tema no ta uno desconoci, mirando cu ta mes un tema aki a uza den aña 2016 door di su exito.
SCUCHA PROME! SCUCHANDO NOS MUCHA Y HOBENNAN TA E PROME PASO PA UN DESAROYO SANO Y SALVO.
Ta hopi importante pa tur mayor, famia, voogd y/ of educador tuma tempo y scucha nos muchanan y hobennan. E ta un parti hopi importante den desaroyo di cada mucha y hoben. Nacionnan Uni ta recomenda pa tur dia tuma un momento den e dia unda nos yiunan ta ricibi tur e atencion cu nan ta mester di dje. Mayor/educadornan por sinta y combersa riba topiconan cu nos y nan ta haya importante y cu tin un influencia positivo den e desaroyo di e mucha/hoben.
Hopi estudionan cientifico ta mustra cu participacion activo di nos comunidad na programanan preventivo tin su efectonan positivo y ta yuda miles di famia rond mundo. Un relacion sano y di comunicacion habri entre mayor/educador y yiu ta hopi importante pa e desaroyo di nos mucha/hobennan den nan bida diario. Nos hobennan por adkiri diferente tools cu nan por haci uzo di dje y asina desaroya nan mes den un forma bon y pa siña tuma decisionnan corecto.
E tema di droga y alcohol ta keda un tema dificil, mirando cu nos hobennan ta haya informacion tur caminda cu no tur biaha ta esun corecto. Pesey ta hopi importante pa mayor y/of educadornan crea un relacion di confiansa, basa riba respet y comprension unda e mucha/hobennan por haci pregunta of papia tocante tur tema cu pa nan y e mayor/educador ta di importancia na e momento ey.
SCUCHA PROME Y TA UN EHEMPEL PA NOS HUBENTUD.
Si tin algun persona cu ta desea di haya mas informacion por tuma contacto libremente cu F.A.D.A na number di telefon 583-2999.
Preveni ta miho cu lamenta.