Despues di e popularidad di e Benu-Sparta-ASA Soccer Camp na April 2018, awor Aruba Soccer Academy su tercer edicion di Summer Camp, hunto cu guest coach Andre Ooijer a clausura como un exito rotundo!
Andre Ooijer ta un hungado conosi na Hulanda, cu a train bow guia di e Ajax su jeugdopleiding. Den su prome añanan como hungado profesional, Andre a hunga defensa pa FC Volendam y Roda JC. Despues Andre a hunga den Eredivisie cu PSV. Andre a disfruta di hunga internacionalmente tambe na Inglaterra pa Blackburn Rovers, pa despues firma back cu Ajax.
Andre a yega di representa Hulanda varios biaha tambe den e FIFA World Cup, alabes tambe den UEFA Cup, pues un hungado estelar cu experiencia na nivel internacional. Ta bon pa remarca cu Ooijer twt riba e team cu a yuda hiba Hulanda na e finale na 2010 di FIFA World Cup na Afrika.
Durante e prome siman di vakantie como 120 mucha a haya oportunidad di train cu coach Andre Ooijer, cu a duna di conose cu e ta wak cu Aruba tin talento! No obstante e solo cu tawata kima henter mainta, e muchanan a train duro y hasi nan best pa nan mehora nan tecnica y asina tambe a pasa un dushi siman eherciendo e deporte cu tanto nan ta stima. Asina por bisa cu muchanan a pasa un siman haciendo algo positivo den un ambiente sumamente profesional, pero tambe cu hopi alegria. Tur mucha a haya fruta tur dia durante break y tambe Benu Pharmacy Aruba a regala tur participante sunblock pa nan por ta protehi contra e rayonan di solo.
E famoso ex-hungado profesional Dirk Kuyt tambe a trese un bishita di sorpresa e ultimo dia pa hasi e muchanan contento cu algun potret y palabra di encurashamento, locual a hasi e ultimo dia di e camp algo special sigur.
Aruba Soccer Academy ta contento di por a ofrece nos hubentud fanatico di futbol e oportunidad di train di un biaha mas bou guia di ex-hungado profesional, unda cu sigur esaki lo duna un aporte nan nan desaroyo como futbolista. Tur esaki ta wordo hasi posibel cu sosten di main sponsor di e camp, esta Benu Pharmacy cu ta sigi aporta na Aruba su hubentud un biaha mas. Tambe ASA ta gradesido na su otro patrocinador nan manera Vacation Store, White Modern Cuisine y Arubianos Local Brand.
Pa mas informacion por tuma contacto cu ASA na 592-5235 of por manda un email na [email protected]