Siman pasa a tuma luga e segundo summer camp di Aruba Soccer Academy (ASA). Durante un siman largo, como 80 mucha entre 4 y 13 aña, parti den categoria U5, U7, U9, U11 y U13a train futbol bou guia di 12 trainer experencia.
Ta di dos biaha cu ASA ta organisa e camp aki, y trainernan ta bisa cu por mira bek riba un siman hopi exitoso.
Coach David “Appie” Abdul ta conta cu tur dia tabata tin un schedule planea cu actividadnan diseña pa train tecnica, motoriek, ball control y habilidad, y tabata clausura e dia cu un ‘partijtje’. Tambe tabata tin un dia cu a duna un tributo simbolico na Abdelhak Nouri, hungado di apenas 20 aña di edad di FC Ajax cu a sufri un derrame cerebral durante un wega algun dia pasa. Cu e gesto aki ASA kier a mustra nos apoyo pa Nouri, pero tambe consientisa e muchanan di e importancia di solidaridad den deporte. Otro dia tabata tin waterdag, caminda muchanan a hunga wega cu awa, cu spons y cu waterballon, esaki tabata un dia hopi leuk. Un di e highlights tabata dia nos a haci un Penalty Shootout, caminda cada participante sigun nan categoria a haya chance pa tuma 5 penalty. Dependiendo di cuanto goals nan a score, nan a wordo parti atrobe den Gold Cup y Silver Cup, y di cada grupo a saca prome, segundo y tercer lugar. Pa algun mucha esaki tabata hopi spannend, el a hisa e competencia entre otro, pero tabata un bon training pa “good sportsmanship”. Na final di e camp, tu e muchanan a risibi un certificado di participacion tambe.
Tambe ASA tabata tin e honor di presencia di Coach Edward Breinburg, cu pa añas caba ta headcoach di SV Excelsior na Rotterdam, tata di ASA su trainer vast Reinhard Breinburg. Ta duna ASA hopi orguyo pa bisa cu Coach Breinburg a keda impresiona cu e nivel y talento di nos hoben futbolistanan.
ASA kier tuma oportunidad pa gradici dos sponsor cu a contribui na e summer camp, cu ta Subway y Save-a-Lot, cu a yuda pa e muchanan por a disfruta di algun snacks saludabel durante e siman di camp, y tambe Nagico cu ta main sponsor di ASA.
ASA ta un trainings school di futbol pa mucha entre 4 pa 13 aña di edad, zowel e aspecto tecnico, ball control y abilidad, pa yuda nan sigui crece den e deporte. ASA su focus ta pa ofrece un curriculum structura bou guia di trainers cualifica, pa duna un experiencia positivo y leuk!
Pa mas informacion di ASA por manda un email pa [email protected] of yama 592-5235.