EHH conoci como Encuentro Hijos e Hijas of Encuentro di Hobennan ta bay tin un anochi di informacion. E.H.H. ta un programa internacionalmente conoci como Youth Encounter, cu na Aruba ta forma parti di e programanan di Fundacion Pro Famia Feliz. Durante e anochi di informacion lo splica un poco di e historia di E.H.H., lo cera conoci cu algun miembro di e ekipo di E.H.H. cu ta dirigi un fin di siman di encuentro y lo scucha kico ta e metanan cu E.H.H. kier logra pa cu e hoben di Aruba.
Encuentro di hobennan su metanan ta dirigi riba e hoben. Kico nan kier logra den bida, si nan ta contento ken nan ta, pa nan ta conciente di ta un hoben responsabel, di tin un bon relacion cu su mayornan y pa nan ta conciente cu nan ta un yiu di Dios. Prinicpalmente E.H.H. ta traha riba e relacion familiar manera e nomber di e fundacion mes ta bisa: “Pro Famia Feliz”.
Temanan duna durante un fin di siman di E.H.H. no ta topiconan usual cu nos ta custumbra di scucha na radio of lesa den corant, manera adicion, sexualidad, criminalidad, etc. Pa cu esaki tin instancianan profesional cu ta informa y guia e hobennan aki. Mas bien ta trata akinan di topiconan simpel cu den bida nos no ta tuma tempo na e cosnan aki y kico ta nan significacion.
E bunita di E.H.H. ta cu e hoben cu a participa caba durante un fin di siman di E.H.H. anteriormente ta dirigi e encuentro door di sigui un programa special. Pues e ta un programa di hoben pa hoben den comunidad.
E.H.H. ta pa tur hoben cu kier conoce y descubri mas di su pontencial y kier ta un miembro activo y participativo den famia. Tur hoben cu tin 15 aña te 23 aña por participa mientras cu nan ta biba cerca nan mayornan y no tin yui pues nan mes no ta mayor ainda.
E anochi di informacion ta diahuebs dia 28 di Juni pa 7:30 di anochi na Centro Pastoral Aruba na Santa Cruz. Centro Pastoral Aruba ta keda pabou di Misa di Santa Cruz na bandi di Colegio San Jose y por yega eynan door di tuma e caminda pabou di notario Tromp (pabou di Colegio San Hose) bay nort. Fecha di e proximo E.H.H. lo ta e fin di siman di 7, 8 y 9 di Juli 2017.
Nos ta wardabo, hoben hunto cu bo mayor(nan) sin falta na e anochi di informacion!
Pa mas informacion tocante E.H.H. por tuma contacto cu Patrick of Setty Christiaans na telefon di cas 585-6964 of na celular, Patrick na 593-4522 y Setty na 592-2170.