Willemstad Curacao: Djaluna 24 di yüli 2017, alrededor 04.45 ‘or sentral a dirigí un patruya na un klup nokturno riba Gosieweg despues di a risibí yamada indikando ku tin un bringamentu i lòsmentu di bala dilanti di e klup. E patruya dirigiendo su mes pa e sitio subiendo Gosieweg a tuma nota di un outo (Suzuki Swift) ku na momentu ku e shofùr a nota e presensia di un patruya polisial a hisa velosidat. E patruya a sigui su tras i a mira e shofùr tira algu fo’i bentana na altura di un kompleho di establesimentu riba Gosieweg. E outo a keda interseptá dor di otro unidatnan ku tambe tabata kaminda pa asistí e patruya polisial na e klup. Despues ku a para e outo polis a bai bèk na e sitio kaminda e shofùr a tira algu for di bentana. Na e sitio despues di un búskeda polis a haña i konfiská un pistol kaliber 38 ku 7 bala skèrpi.
En konekshon ku esaki polis a detené e shofùr e hòmber E.L.D. nasé na Venezuela di 32 aña di edat komo sospechoso di violashon di lei di arma di kandela.
A presentá e sospechoso dilanti un fiskal ouksiliar ku a ordená su enkarselamentu pendiente mas investigashon.