Despues di reunion cu CAft, fraccion di AVP mester tin berguensa di nan maneho financiero

0

Diabierna ultimo Parlamento a toca turno pa reuni cu CAft. Henter e delegacion di CAft mediante nan presidente sr. Raymond Gradus a duna un presentacion di e situacion actual. Locual ta remarcabel cu meneer Gradus a lesa nan bevindingen riba 2017 traduci na papiamento crioyo, sin vaselin. El a cuminsa na bisa cu e uitvoeringsrapportage di derde kwartaal caba a duna un imagen hopi preocupante. Mike Eman e momento ey tabata celebrando su cumpleaños riba e brug, esta dia 1 di september 2017, cual por cierto pueblo a paga na un suma total di Afl. 142 mil florin pa un solo anochi di fiesta. Claro cu AVP den pleno campaña no a lesa dicho rapport.

Deficit di 405 miyon florin
Sr. Gradus a splica cu e situacion financiero despues di september a keda empeora y a alcansa un deficit di 130 miyon florin na final di december 2017. Hustamente locual Parlamento nobo a aproba como Suppletoire begroting na december ultimo pa paga debenan cu AVP a ocasiona, surpasando locual nan tabata tin aproba door di Parlamento pa por a gasta. Tambe sr. Gradus a enfatisa, di acuerdo cu e ley di LAFT, cu den 2018 Aruba lo mester yega na un surplus di +0.5%. Den mesun rosea sr. Gradus a elabora riba e situacion cu Aruba ta aden actualmente, cual ta duna un señal hopi cla cu esaki lo no wordo alcansa. Pues desde awor ta anticipa cu lo no por cumpli cu e ley aki. E deficit 2018 actualmente lo alcansa 275 miyon florin y ainda mester agrega pa ley di LAFT 130 miyon florin, pues nos ta papia di un deficit di 405 miyon florin di AVP. Segun sr. Gradus lo duna espacio pa Gobierno nobo presenta su plan financiero con e ta bay atende cu e asunto ‘precario’ aki.

Troce di berguensa
Despues cu CAFT a critica e maneho anterior asina tanto, Parlamentario Endy Croes kende tabata activamente den dicho reunion a splica cu tabata bisto con Richard Arends, Marlon Sneek, Mervin Wyatt Ras y Jennifer Reyes tabata troce den nan stoel di berguensa. Remarcabel ta cu ningun tabata tin e corahe di lansa ni un solo pregunta of trata por lo menos na defende nan maneho financiero desastroso. Momento cu reunion a termina y sin a haci ningun pregunta, e 4 miembronan di Fraccion di AVP cu tabata presente a bin para den e grupo pa saca un potret y nan a bandona e sala mesora. Un rato despues AVP ta emiti un noticia cu CAFT ta masha contento cu AVP a maneha e pais aki cumpliendo cu tur norma.

Norma di ladron
Segun Endy Croes, cu e unico norma cu Mike y AVP a cumpli cun’ e ta e norma di Ladron y sinberguensa. E parlamentario ta recomenda pueblo pa scucha e conferencia di prensa di CAFT di diabierna ultimo hopi cauteloso y por scucha con e presidente ta laga AVP sunu. Nan ta e unico causante di e “Desastre Financiero” cu Aruba ta hinca actualmente aden. Tin hopi mas pa bin. Pueblo no ta manera cu AVP a pluma e pais aki lagando un debe astronomico riba schouder di nos yiunan di awe y nos futuro generacionnan. Endy Croes ta termina bisando cu AVP no por bolbe nunca mas!

Comments

comments