Diabierna siman pasa a cuminsa cu tratamento di e proyecto di Ley All Inclusive, pa cual tabatin basta interes. Tanto Minister Alex Schwengle y Minister di Turismo, esta Otmar Oduber tabata presente den parlamento.
Sinembargo parlamentarionan di oposicion a cuestiona con por ta posibel cu ta Oduber so ta presente den un reunion cu un tema asina importante pa e principal pilar economico di Aruba. Minister Schwengle tabata un rato presente pero no den forma continuo.
Parlamentario Ruiz Maduro a cuestiona principalmente ausencia di Minister di Labor drs. Paul Croes. Tambe el a papia riba e conflicto di interes cu aworaki cu ta trata e ley aki, Minister di Asuntonan Economico ad interim ta e mesun Minister di Turismo. Manera tur hende sa, Minister di Asuntonan Economico ing. Mike de Meza ta convalenciendo, despues di un operacion relaciona cu su curason.
Lider di fraccion di MEP mr Evelyn Wever Croes a cuestiona cu nan a haya un sinopsis di e rapport di PriceWaterHouse, pero tabata kier esaki completo ya cu den e rapport completo ta para cu mester “brasa all inclusive”. E otro miembro di fraccion geel Danqui Oduber a bisa cu e kier haya sa for di Minister Schwengle si ta berdad cu el a pidi den Conseho di Minister pa hala aden e proyecto di Ley di All Inclusive.
Tabatin hopi discusion riba existencia di un rapport cu Minister Oduber ta nenga cu ta existi. Oposicion ta papia di un rapport riba All Inclusive, o sea un concepto cu nan ta insisti cu ta existi. Pero e mandatario a bisa cu e no por entrega un carta cu no ta un rapport. Mas cu 20 minuut a bay na discusion riba e rapport cu no ta esun di PWH riba cual Minister Oduber a contesta cu tin mas di 20 rapport riba e tema aki, pero a keda insisti cu esun cu oposicion ta papia di dje no ta existi.
Parlamentario Chris Dammers a haya e ley presente ta uno haci den forma transparente cu esaki a wordo presente, tur e informacion poni riba e reparticion financiero di e grupo di bishitantenan cu ta haci uzo di e sistema All Inclusive. Den esaki principalmente e taxistanan y restaurantnan pafo di hotelnan cu ta keda afecta. CBA ta bisa cu turista di all inclusive ta laga 48% menos pa dia na Aruba. Pesey e trend mundial pa regula esaki, debi su efecto financiero economico riba un pais.
Andin Bikker di PDR den su presentacion a bisa cu ningun partido a bay eleccion cu idea pa bini cu un ley All Inclusive, pesey el a puntra e Minister di unda a saca e mandato, interveni den derecho asina fundamental di doñonan di hotel. E ley aki si e wordo aproba por haci Aruba vulnerabel pa un cantidad grandi di claim. E ta sinti cu kier experimenta cu e tema aki. Ademas e credit rating di Aruba ta core peliger pa e ley mal pensa. El a recorda cu Gobierno no a pone ni un debchi pa traha e hotelnan. Pesey Banco Central ta conseho pa bini na compensacion cu por core den miyones. Ademas, un inversionista den sector hotelero ta wordo descurasha cu tipo di manehonan asina. El a resumi cu hopi di loke Minister Oduber a bisa ta wordo desbarata door di e rapport di Banco Central.
Awe diamars 23 Augustus 2016, pa 9 or mainta e reunion publico lo sigui den parlamento. Click aki pa lesa e raport.