Gobierno Cubano a compromete su mes na ricibi tur ciudadano Cubano deporta for di Merca, na momento cu nan wordo gara di kier drenta Merca ilegalmente. Esaki despues cu President saliente Barack Obama, a pone un fin na e politica migratorio cu desde 1995 tabata duna un trato migratorio preferencia na Cubanonan.
Cuba y Merca a firma un acuerdo migratorio nobo na La Habana, cual lo ta e base pa un miho relacion bilateral y cu ta busca na garantisa un migracion “regula, sigur y ordena”. Esaki segun un comunicado door di agencianan oficial.
Despues di mas di un aña di negocacion, e dos paisnan diahuebs a anuncia un acuerdo migratorio nobo. E ley migratorio anterior pa decadanan tabata un tema di conflicto den e relacion bilateral di e dos paisnan. E acuerdo migratorio nobo aki a bin, net un siman prome cu e Donald Trump asumi presidencia di Merca.