E ley di abuso di mucha t’ey den nos leynan, pero ta keda den man di corte di husticia pa duna e castigo y no den man di Parlamento segun Parlamentario di AVP, Desiree de Sousa-Croes.
E ta splica cu mester protega nos muchanan y ta lastima cu horiblemente cu algun anochi pasa a haya un meneer cu a abusa di locual por a compronde di prensa di un mucha muhe cu lo ta su yiu di criansa.
Na prome luga de Sousa-Croes ta bisa danki na Cuerpo Policial cu tabata atento y por a pone man rapidamente riba e persona aki y locual ainda ta mas remarcabel ta cu a hay’e “Con las manos en la masa” literalmente. Tur hende por a wak riba medionan social cu segun e parlamentario, no por tin un hues of fiscal na mundo henter, cu por duda den e culpa di e persona aki.
Por a lesa den medionan social cu e hendenan ta hopi disgusta di loke a pasa, loke ta compronde hopi tambe ta punta dede na Parlamento di Aruba. Parlamento tin su lomba hancho y por wanta hopi critica, pero toch de Sousa-Croes a bin dilanti bisa, cu a haci locual cu ta den nan man pa haci te awor, ya pa algun aña pasa caba.
De Sousa-Croes a agrega cu for di 2012, ta ley di 27 di April, unda cu minister a presenta varios cambio den nos codigo penal y un di nan ta unda cu a hisa e castigo pa abuso di mucha. E tabata na 8 aña, a his’e te cu 12 aña y despues a bolbe his’e den un otro articulo, esta buki 2, articulo 210, inciso 2, ta duna locual cu ta yama un ‘strafverzwaring’ di un tercera parti. Esey ta nifica cu e castigo ta 12 aña cu un tercera parti cu por yega te cu 16 aña. Ki ora ta duna un strafverzwaring ora ta trata un relacion entre victima y abusador di confiansa. Sea cu e ta su mayor, tambe su stiefvader of stiefmoeder, un docente of coach, un luga cu a pensa cu a hiba e victima y ta safe. E persona cu ta traha eynan cu a abusa di e mucha, tambe ta haya un tercera parti riba e castigo cu ya nan a haya.
Asina ey e maximo pa abuso di mucha, te na 16 aña. Un persona cu abusa di un mucha por haya. Esaki t hasta 1 aña mas cu tin awor aki riba matamento no premedita.
Parlamento di Aruba, den su totalidad a bay di acuerdo cune, pa hise asina hopi y a duna pueblo tur su rason, cu berdad den e ultimo añanan, aunke a his’e, no ta mir’e bek den e castigonan duna.
Fiscal ta exigi y hues na fin ta esun cu ta impone. Esun cu ta duna e castigo berdaderamente.
De Sousa-Croes, como presidente di comision di husticia, a haci un investigacion chikito den e ultimo añanan aki, e maximo di e castigo ta di 5 aña, hopi leu na locual cu por ta e maximo y tambe cu por a prueba cu e persona aki a haci’e. A haya esun di mas abao cu a wordo duna recientemente, tabata simplemente 120 ora di castigo cu e mester a bay verf un caminda of haci luga limpi pa pueblo. Un persona cu a abusa un mucha, cu pa resto di su bida lo keda carga e abuso aki cometi contra dje.
No solamente e dolor fisico y emocional cu e mucha ta pasa den dje pa motibo di abuso, pero riba dje e hecho cu na caminda den e proceso aki, tabata tin hende cu no a kere cu e mucha a pasa den e abuso aki. No por bin bisa cu no a kere cu e mucha a pasa den e abuso aki y ta duna un abusador un castigo asina bou.
Un suplica ta bay den nomber di fraccion di AVP na tanto fiscal como hues pa por fabor scucha pueblo di Aruba, scucha e dolor di e victima, di e mayornan, di e famia, di esnan cu ta stima e criaturanan aki di henter pueblo di Aruba, pa duna castigonan mas pisa, segun de Sousa-Croes.