Angelo Tromp desde Mei, a wordo nombra como director interino di Museo Arqueologico di Aruba, cual ta un tarea cu el a ricibi di ministerio di cultura. Su funcion anterior y actual ainda ta como atache cultural na Cas di Aruba na Hulanda, trahando estrechamente cu ministerio di Cultura. Mirando cu e director anterior di Museo lo a finalisa su posicion na Mei, Tromp a wordo pidi si por haci e funcion pa un tempo defini. El a tum’e cu hopi placer mirando cu den pasado e tabata envolvi cu museo caba. E ta un museo, siguramente hopi profesional y ta duna un realse na nos arena cultural na Aruba. Ta pone hopi enfasis riba nos herencia y cu placer y cu un bon team ta trahando pa sigui mantene e nomber di e museo na halto.
Actividadnan
Alabes tambe Tromp ta menciona cu lo bay drenta un aña di celebracion, cual ta e aniversario di e museo. E museo a wordo funda na aña 81. Ta cumpliendo fin di aña 35 aña di existencia, pa cual tambe lo tin eventonan special. Papiando di eventonan special, lo bay tin otro siman, dia 18 di September tambe un evento cu tin bon acogida y cu den pasado tambe a haya hopi cobertura den media, pero tambe di parti di pueblo di Aruba cu a participa na esaki, cual ta e expedicion arqueologico.
E edicion aki lo bay ta na San Nicolas. A hacie dos aña caba pabao di brug y awor ta bay pariba di brug pa pone enfoke riba e sitio arqueologiconan cu nos tin den e area eynan.
Siguramente tambe si tene na cuenta, e area di Sero Colorado, unda cu tin algun sitio arqueologico y hayasgo cu kier pone enfoke riba nan.
Ta haci’e cu un team y ta haci’e cu diferente partner, di cual museo ta trahando estrechamento cu fundacion Museo Arubano, cual tambe tin na nan encargo museo di industria, cu lo habri otro siman tambe y museo di comunidad y esakinan siguramente tambe lo ta parti di e recorido na San Nicolas y ta haci e programa aki tambe hunto cu fundacion monumento di Aruba (Stichting Monumentenfonds) y cu Ministerio di Cultura.