Diaranson 3 di Mei, pa 8 or y 17 di mainta, patruya di polis ta wordo manda pa santana di gobierno na Zeewijk pa un caso di destruccion. Na e sitio agentenan ta papia cu e persona di DOW encarga cu e santana, e homber B. B a declara cu desconocinan a destrui un kelder y a bay cu un cabes di carpachi. Tambe el a bisa cu esaki ta di tres biaha cu e ta sosode. Un luna pasa tambe nan a destrui e kelder banda di esaki y tambe nan a bay cu e cabes di carpachi. E kelder a wordo destrui y nan a saca e caha di morto for di den e kelder. Mayoria biaha e parti abao di e caha ta putri y e restonan mortal ta cay abao na suela. B. a declara cu esaki no ta algo cu ta wordo haci pa hendenan local y cu ta personanan di descendencia Haitiano ta haci esaki. E ta topa cu hopi Haitiano den becindario di e santana y cu nan aña 2012/2013 el a topa cu un muhe Haitiano cu kier a sali for di santanan cu un cabes di carpachi y kende a declara cu e ta haci esaki pa su deseonan wordo cumpli. Pero B. a impedi e muhe esaki y el a pon’e bek.
E bisiña C. riba 2 di Mei pa mas o menos 8 or di anochi a sali for di su cas y el a wak dos persona cu e conoco pa cara y cu ta di descendencia Haitiano bin sinta riba e banki dilanti santana. Ora cu el a regresa su cas pa mas o menos 1 or di marduga di diaranson 3 di Mei, ainda e dos hombernan tabata sinta ariba e banki. El a ripara cu e porta di santana tabata hancho habri. STHOD y DAR3 (recherche San Nicolaas) a bin na e sitio, como tambe departamento di Hygiena y Ad Patres Funeral Home, cu ta responsabel pa e graf.