Durante e celebracion di 30 di existencia di SER, Sr. Rudy Geerman, presidente di SER a
splica cu SER su contribucion actual den desaroyo di nos comunidad ta pa enfoca pa logra y
mantene un nivel di prosperidad economico stabiel y solido den temponan dificil como tambe pa e reparticion di e prosperidad ta mas ekilibra posibel den comunidad. Ta hopi importante pa nos como comunidad realisa cu desaroyo di un pais NO por ser midi solamente pa medio di indicador economico pero cu e indicadornan social ta di mesun importancia pa por tin un bista real y completo di e desaroyo y retonan. Di mes manera ora ta trata pa fiha maneho y accionnan den maneho tanto factornan economico como social mester wordo evalua y indica, pues den e mundo di awe economia y situacion social ta bay man den man cu otro y pues no por ser considera dos factornan independiente di otro.
Cu e nocion aki SER a formula su mision esta: pa : Como organo di deliberacion y conseho,
duna conseho independiente na un of mas minister, basa riba investigacion y analisis cu e
meta pa señala aspectonan social economico na bienestar di e comunidad. E vision di SER ta defini como un organisacion independiente y profesional cu tin bista riba e desaroyonan den nos comunidad i cu den un forma pro activo ta duna conseho riba maneho pa cu e retonan y den nos comunidad.