AMC Unicon, su departamento cu ta mantenimento, di e cantidad di trahado, cual ta 25, 18 tabata tin derecho di voto y e 18nan aki, tur di nan a bin en bloke y a vota unanimamente pa e sindicato.
Segun mediador, Anselmo Pontilius, por a mira cu e horario lo tabata te cu 4’or y mey, pero como cu tur trahado a yega na e ora tempran stipula di 3’or y mey, ya pa 4’or a keda cla. Na momento cu tur hende tey, por cera e referendum, aunke cu ta te 4’or y mey. Den e caso aki, sindicato STA a haya tur hende. Gerencia a wordo representa pa departamento di personal. A informa nan di acuerdo cu ley, e regla cu ta conta, caminda e sindicato por negosha un contracto colectivo.
Den e caso di e departamento aki, e sindicato a pidi e referendum pa e departamento specifico aki, cu ta encarga cu e parti di mantenimento, specificamente y esey a sosode tambe.
Segun Anselmo Pontilius, tin diferencia di opinion den e departamento, pero na final no mester tin un problema den un empresa, pa e trahado dicidi cu e ta organisa su mes. Ta un derecho, un libertad cu e tin. Un di e canalnan cu tin, mediante un contracto colectivo cu ta regla pa ley, e laga e sindicato negosha su condicionnan di trabao cu ta den un documento formal, firma di acuerdo cu ley pa un periodo estableci. Esey nan a haci y den e caso aki, ta conoci e ora cu e dunado di trabao y e sindicato lo bay mesa pa nan si atende cu e parti aki.
Mediador di Gobierno a wordo informa y a haya documento cu nan tabata tin un asociacion di e trahadonan mes interno y nan tabata tin un acuerdo interno. Solamente cu e trahadonan aki a bisa cu nan no ta di acuerdo pa sigui cu e representacion ey y a busca un sindicato pa representa nan, den e caso aki STA y awor aki nan lo cana e caminda legal. Esey lo bay mas facil, den sentido cu e dunado di trabao sa caba cu tin condicionnan di trabao por escrito y nan lo tin cu percura con nan ta atende cu esaki awo.