Semper tabata asina cu Departamento di Impuesto ta e unico instancia cu ta entrega plachinan di number, oficial cu mester wordo poni ariba e vehiculo di motor. Sra. Meverly Romano, vocero di Departamento di Impuesto, ta amplia mas ariba e problematica aki.
Si por tin cualkier otro compania cu ta haci esaki, nan ta haci esaki ariba nan mes, segun Sra. Romano. E ta a base di un acuerdo entre e compania ey y su cliente. Mester realisa cu e plachinan di number aki, oficialmente ta keda determina pa ley. Tambe e ta keda determina hunto cu Departamento di Impuesto, con e diseño mester ta. Si cualke otro compania ta haci algo asina eynan, e ta haciendo algo cu ta incorecto. Lo mester stop esaki, pasobra den futuro lo tin otro companianan cu ta haciendo e tipo di plachinan aki, trahando e tipo di plachinan, e ora no tin control mas kico tin ariba caminda. Por haya numbernan ariba caminda cu ta completamente falso y esey no ta e direccion cu niun ciudadano na Aruba lo kier pa nos pais bay.
Cuerpo di Polis ta haya un lista di Departamento di Impuesto cu nan tin registra den nan data base. Si acaso, nan lo mester sa, y wak’e ariba e lista cu p.e. pa taxistanan, e number ta yega te cu TX- 450.
Mas aleu, Sra. Romano a sigui bisa cu den siman cu a pasa cu nan a haya diferente señalnan di diferente TX cu lo ta falso, ariba autoann cu ta coriendo ariba caminda. Nan ta ariba un alerta ariba esaki. Pero nan no a haya niun caso concreto. Pero si nan logra haya un caso concreto, gerencia lo entrega un denuncia oficial na Cuerpo Policial pa cu esaki.