Aruba Reef Care Foundation cu su metanan pa conscientisa y educa, ta contento di por brinda un serie di lectura cu a ser compila hunto cu otro organizacionnan. E prome lectura ta planea pa e fecha diaranson awor dia 29 di maart, sigui pa diaranson 12 di april y e ultimo ta diaranson 26 di april, 2017. Tur lo wordo teni na Biblioteca Nacional. Den corto nos kier a describi cada un di e lectura nan. E prome lectura ta programa pa diaranson 29 di maart y lo ta titula “Aruba Lionfish Invasion & Management, y“Aruba Lionfish Initiative”. Lo elabora ariba e especia invasivo di Lionfish, pero tambe lo papia ariba e iniciativa pa gara Lionfish . Manera cu ya ta conoci pa publico, Lionfish ta un especie invasivo cu ta dañando nos rifnan severamente y tambe e ecosistema di nos rifnan. Nan ta come gran candidad di otro organismo nan cu ta importante pa un desaroyo saludabel di nos rifnan di coral. E autor lo ta Giancarlo Nunes, Biologo Marino di Universidad di Groningen. E di dos lectura lo ta 12 di april y lo titula “Sea Turtles of Aruba”. Turtuga Aruba lo duna un bista general di e diferente tipo di Turtuga cu ta frequenta nos isla. Lo papia di nan ciclo di bida, patronchi migratorio, menasa y conservación. Turtuga di lama ta un especie den peliger di extinción y nan ta wordo protehi pa ley. Bin siña mas di Turtuga y con pa yuda proteha e creaturanan antiquo. Autor: Sietske van der Wal, Biologo y docente na Colegio Arubano. E di tres y ultimo lectura lo ta diaranson 26 di april y lo titula “Sharks & Rays of Aruba” , Tribon y Chucho di Aruba, den e lectura aki lo profundisa ariba e diferente tipo di tribon, especienan di Chucho of Manta Raya cu tin nan hábitat rond di Aruba. Lo bo siña con pa reconoce e diferente especie y nan comportacion cu humano, tambe kico ta nan rol den e awanan rond di Aruba. Autor: Miranka van Breugel, Global Finprint, Wageningen Marine Research y Universidad di Groningen. E orario pa tur tres lectura ta di 7:00 pm pa 8:00 pm.