Den un Reino ideal islanan di Reino mester traha hunto

0

Un tema cu a wordo trata durante e reunionnan di IPKO diaranson, 14 di Juni, ta e tema di Reino. Kico ta e relacion cu Aruba y demas paisnan den Reino Hulandes kier mira idealmente den den aña 2040. Lider di MEP, Evelyn Wever-Croes ta enfatisa cu pa nos yega na e relacion ideal den Reino, ta importante pa nos para keto y analisa con e situacion ta awo.  “Partido MEP a haya e oportunidad pa sinta den gruponan chikito y brainstorm loke nos ta mira como puntonan fuerte y e puntonan debil di Reino. Cua ta e oportunidadnan cu Reino ta ofrece nos como tambe kico ta e menasanan pa Reino na e momentonan aki.  Mi a forma parti di un comision na unda mi a hiba palabra y a mi a trece padilanti cu pa Partido MEP, e Reino ideal mester ta consisti di paisnan cu ta trata otro a base di madures y respet mutuo. Papiando den nomber di Aruba mi por bisa cu loke cu Aruba kier den un Reino ideal ta e situacion cu nos a lucha p’e na aña 1986 y e Status Aparte cu nos a haya dia prome di Januari di e mesun aña. Nos a haya nos propio moneda, nos Banco Central, nos Parlamento y nos Gobierno.  Pero despues di 1986, a pasa varios desaroyo cu a pone cu Aruba a perde su autonomia. Y esaki nos no kier. Nos kier bay bek na e situacion di 1986 na unda nos tabatin nos autonomia y riba cierto tereno nos tabatin garantia di Hulanda pa su intervencion y supervision.   Aunke nos mester admiti cu nos mes un Gobierno tabata e causante cu nos a perde nos autonomia. Si Gobierno di AVP no a hiba asina un mal maneho financiero e ultimo ocho añanan cu a pasa, lo nos no a haya e supervision financiero manera nos a hay’e. Supervision talbes cu si, pero cu nos mes por a bin cun’e y maneha”.  Lider di MEP ta sigui bisa: “Awo aki, nos ta coriendo e mesun riesgo cu supervision of “aanwijzing” riba e tereno di integridad, despues di e kiebronan di integridad den e Gobierno di Mike Eman. Despues di e escandalo den corupcion na gran escala den gobernacion di Mike Eman y e decisionnan ekiboca cu su Gabinete y su Parlamento a tuma entorno di e caso di corupcion aki cu ta bou di investigacion.  Si e situacion aki conduci cu Hulanda ta bolbe mete y manda un “aanwijzing” e biaha aki riba e tereno di integridad, ta e Gobierno di AVP mes a buske.  Den un Reino Ideal nos mester trata otro cu madures y respet mutuo.Nos mester siña di loke nos a haci fout y percura pa den un Reino ideal nos por trata otro a base di madures y respet mutuo. Den Eerste Kamer, mi a splica cu pa mi, madures ta cu cada pais ta atende su propio problemanan. Aruba mes mester a atende cu su problema financiero sin laga Hulanda mete.  Esaki ta mescos pa cu e tema di integridad. Aruba mes mester atende cu e tema di integridad y corupcion na gran escala den gobernacion actual pa evita cu Hulanda ta bolbe bin mete. Esaki ta madures. Atende cu nos problemanan y si di berdad no por, e ora por bati na porta di Hulanda pa busca ayudo. Pero no por keda steun riba Hulanda pa delaster un cos. Tambe mester tin respet. E trato di respet mester ta mutuo entre Aruba y Hulanda.  Nos ta convenci cu den un Reino Hulandes cu ta trata otro a base di e dos principionan aki, esta madures y respet, tin futuro y oportunidadnan grandi unda nos por yuda y siña un di otro.  Den un Reino ideal, e islanan di Reino den Caribe lo mester traha mas hunto. Riba e tereno di turismo, nos por ofrece e “ABC Island Hopping”, na unda nos tur ta traha hunto pa engrandece e lasonan entre e islanan. Riba e tereno di enseñansa nos por yega na palabracionnan entre e islanan. Igual pa loke ta trata e tema di salud y hopi otro terenonan na unda nos por traha hunto. Y mirando con chikito e islanan ta, cu mas rason ainda nos mester traha hunto. Nos lasonan historico ta uni nos y tin un futuro briyante nos dilanti si nos logra traha hunto den Reino” sra Wever-Croes ta termina bisando.

LEAVE A REPLY

Please enter your comment!
Please enter your name here