Diadomingo ultimo a tuma lugar e final di e weganan Panamericano 2016, cual a tuma lugar na Eagle Beach Aruba. A hasi uso di e centercourt y e set up completo cu lo wordo usa e siman aki pa e Aruba Beach Tennis Open 2016, e torneo di mas grandi di mundo den e deporte di Beach Tennis.
Desde un principio por a tuma nota cu e ekipo di Brazil a bin full prepara pa defende nan titulo di 3 aña consecutive. Durante algun wega di e semi final a duda cu esaki lo ta e caso pero na tur ocasion di nobo nan a logra termina e weganan y bay cu e triunfo. Asina a yega na e final nan diadomingo, den e categoria di doubles masculino, femenino y tambe mixto. Den tur 3 categoria e final a bay entre 2 ekipo di Brazil.
Den e categoria femenino, nos a wak e 4 “rival” nan di semper di e pais Brazil. Aki ta traha di e duo Joana Cortez (4) y Rafaella Miller (7) contra e otro ekipo di Brazil forma pa Samantha Barijan (19) y Flavia Muñiz (21). Aña pasa Joana a gana e torneo aki hunto cu Samantha pero federacion di tennis na Brazil a traha otro ekipo e aña aki, mirando e standing actual di cada un hungador. Pa nos duna un indicacion na kico nos ta referi ta standing, esaki ta bo ranking riba ITF su ranking. Esaki nos tin tras di cada hungado su nomber (x). Den un final cu a bai 3 set, Joana y Rafaella a logra keda cu e titulo di campeon ganando Flavia y Samantha cu e score di 5-7 / 6-1 / 6-3. E ekipo di Joana y Rafaella ta actual campeonnan Mundial tambe, titulo cu nan a gana den Juli ultimo na Italia.
Pa loke ta e masculinonan, un cara super conoci na Aruba y sigur stima pa hopi, Vini Font (10) a forma ekipo cu Vini Chaparro (83), kende nan a hunga e final contra un duo cu a bin ta creciendo den e deporte di Beach Tennis den e ultimo aña. Ta trata aki di Diogo Carneiro (28) y Ralff Abreu (26). Na final, despues di 3 set atrobe, e duo di Diogo y Ralff ta sali vencedor cu e score di 6-3 / 6-7 / 6-3.
Categoria mixto tambe a bay entre 2 ekipo di Brazil cu a wordo forma pa Vini Font y Joana Cortez contra Diogo Carneiro y Flavia Muñiz. E mes un 2 ekipo nan cu a hunga e final den 2015y cu den 2016 a keda cu e mes un resultado cual Vini y Joana a gana. Por menciona cu nan tabata e ganadonan den 2014 tambe. E Victoria a bay den 2 set cu e score nan di 6-3 / 6-1
Ta bon pa remarca cu tin un competencia regional e hungadornan participante no ta gana cen sino punto cual ta juda nan cu nan ITF ranking mundialmente. Na e mes un momento nos kier informa cu Aruba ta e pais selecta pa ITF pa organisa e weganan Panamericano pa 3 aña sigui, cu otro palabra cu nos lo por admira e torneo aki den 2017 & 2018 tambe. Un campeonato cu ta carga e titulo di “regional championship” den e mundo di beach tennis. Banda di e Panamerican Championship nos tin World Team Championship cual ta tuma luga na Russia, despues di esaki ta sigui pa World Championship cu ta tuma lugar na Italia, sigui pa European Championship cual ta cambia tur aña di anfitrion y e ultimo championship ta tuma luga na Aruba.
Pero, cu e final di e weganan Panamericano, no ta nifica cu beach tennis a caba pa e aña aki. Dialuna ultimo a cuminsa e compentencia internacional di Beach Tennis mas spera pa cada hungado, cual ta e ITF Tournament cu a cuminsa dialuna ultimo na Eagle Beach. Tur dia tin weganan cu ta cuminsa pa 9or di mainta cu ta termina te 10or di anochi. Henter e siman lo por presencia un total di 1200 participante, 32 pais, cu lo competi pa wak ken ta bai cu e premio di mas grandi. Un premio total di 40 mil dollar pa reparti den diferente categoria. Nos ta hasi un invitation un biaha mas pa henter Aruba pa pasa na Eagle Beach. E weganan lo continua te cu diadomingo 20 November 2016.