Anne Marie Proveyer-Groot, Director di Departamento di Enseñansa, ta splica riba e desaroyonan di enseñansa, mirando cu tecnologia ta hunga un rol grandi den e mundo di educacion di awendia.
Den e campo di enseñansa, e meta ta pa drecha locual cu por wordo drecha cu e recursonan cu e sistema di enseñansa tin. Diferente directiva di scol ta enfocando riba e plannan di mehoracion p’e siguiente aña escolar. Tambe lo traha un plan nacional di 2018 pa 2030.
En cuanto e hecho cu e cifranan di e studiantenan no a mehora of hisa ainda apesar di tur e medionan cu tin compara cu antes manera tecnologia, sra. Proveyer-Groot ta splica cu tecnologia por ehempel no ta e contesta riba tur problema cu tin den enseñansa y buki ta keda hopi importante. Den e caso di programanan (softwares), mester cumpra programanan cu en berdad ta util p’e studiante. Mester planifica cu e recursonan tin disponibel p’asina cumpra programanan cu ta bale la pena.
Hunto cu IPA, nan kier set up plannan di guia pa maestronan, cual nan kier continua cune p’e añanan mas dilanti p’asina educa e maestronan di e metodonan nobo di duna les. Maestronan mester purba adapta na e cambionan cu enseñansa tin, pero tambe tin cierto parti manera lesamento pa muchanan di Kleuterschool of Basisschool mester wordo duna den forma tradicional, segun sra. Proveyer-Groot.