Den corte a pidi 22 aña di Prizon pa persona cu a mata ‘ Lalo ‘ Webb

0

Aunke cu e homber E.H.(24) ta para riba cu e no a haci nada, Fiscal ta hay’e culpable di a tira Lyandro Webb mata banda di Hooiberg y a exigi 22 aña di prison. Fiscal ta haya cu den e caso aki por mira claramente cu a planea tur cos, caminda e intension lo tabata pa e victima bay cumpra un arma di candela pero en realidad tabata un trampa pa a tir’e mata.

ACUSACION
Ayera Corte den Promer Instancia durante oranan largo a trata e caso di asesinato di Lyandro (Lalo) Webb. Fiscal a bisa cu e acusacion contra e sospechoso E.H. ta cu dia 19 Maart 2015, hunto cu otronan, a mata Lyandro Webb. Fiscal a mustra cu E.H. a tira e victima den cabez. Esaki Fiscal ta considera complice di asesinato.
Mama di e difunto, señora Webb, tabata presente den sala di Corte, caminda el a duna Hues recibonan cu ta mustra e daño cu el a sufri door di a mata su yiu. Ta trata aki di e gastonan di entiero cu a suma na 12 mil florin. E mama ta demanda pa e sospechoso paga e gastonan di entiero.

SOSPECHOSO TA NENGA
Hues a puntra E.H. si ta berdad cu el a tira Lalo mata. E.H. a bisa cu e no tin nada di haci cu e caso aki. Hues a mustra cu durante ultimo interogacion, E.H. a haci uso di su derecho di silencio. Hues a puntr’e si e lo papia, el a bisa cu e lo contesta loke e por papia.
Hues a bisa cu for di e procesverbal por compronde cu a haya e difunto den un auto banda di Hooiberg. Autopsia ta mustra cu el a haya un tiro den cabez cu a causa su morto. A tuma muestranan di DNA riba curpa di victima y esaki ta cuadra cu e DNA di E.H.
E.H. ta para riba cu e no tin nada di haci cu e caso ey. El a bisa Hues cu no a bay eynan mes. El a bisa cu e tabata na cas ta bebe. Hues a menciona cu E.H. lo a menciona nomber di su ruman homber, N., y cu e DNA lo por ta di su ruman. El a bisa cu e no ta bisa nada riba su ruman. Hues a bisa cu no por ta posibel cu ta e ruman. Tur cos ta mustra cu ta E.H.

A RECONOCE STEM
Segun E.H. e tabata na cas ya cu el a caba di sali for di KIA y hendenan tabata bishit’e. Hues a sigui bisa cu a tap telefoon y a base di esey a reconoce E.H. su stem.
Hues a mustra cu dia 19 Maart 2015 a constata cu E.H. a yama un persona y a bisa e persona cu e mester bay pura na e lugar palabra. Hues a sigui bisa cu investigacion a mustra cu e señal di yamada tabata for di Hooiberg unda e curpa di e difunto a wordo haya.
Hues a bisa cu e persona cu a scucha, Recherche a interoga y el a bisa cu el a papia cu E.H. y cu nan tabata papia di marihuana. E.H. a bisa Hues cu el a scucha e stemnan pero e no ta reconoce su stem y tampoco e persona.
Hues a sigui bisa cu E.H. a yama un homber P. y tambe Baba Ras cu tabata sera den KIA. E.H. a bisa Hues cu el a wordo confronta cu e yamadanan pero e no ta reconoce e stemnan y mucho menos Baba Ras.
Hues a bisa cu for di e combersacion por compronde: “nos a caba”. Por conclui cu ta riba orden di Baba Ras a mata Lisandro Webb. E.H. a bisa Hues cu nunca el a papia cu Baba Ras. Hues a remarca cu E.H. tabata sera den KIA y ta facil pa papia cu Baba Ras. Segun E.H. unda e tabata sera e no conoce Baba Ras.
Hues a mustra cu mas laat atrobe E.H. a yama Baba Ras y a bisa: Nos a fix e, e ta completo”. Esey ta mustra cu E.H. ta confirma cu e job ta cla. E.H. ta keda para riba cu e no ta reconoce e stemnan y nunca el a papia cu Baba Ras.

CULPA SU MESUN RUMAN DI A MATA LALO
Hues a puntra E.H. cual tabata e ultimo biaha cu el a mira su ruman. E.H. a bisa cu e ta haci uso di su derecho di silencio. Hues a remarca cu na Recherche, E.H. a bisa cu su ruman homber N. lo por ta esun pero si e no papia, tur cos ta keda mustra riba dje. Hues a bisa cu si E.H. ta bisa cu ta su ruman pero no ta bisa nada, e ora ey E.H. no ta yudando su mes. E.H. a admiti di a bisa asina aña pasa pero awor e ta haci uso di su derecho di silencio contra su ruman.
Ta asina cu e ruman N. ta fugitivo pa un tempo caba.
Hues a remarca cu via whatsapp E.H. lo a contact su ruman. Segun E.H., el a wordo confronta cu esakinan pero e no ta reconoce nan. Hues e ora ey a mustra cu e cellular ta di ruman muher di E.H. y cu e ta usa e cellular aki hopi. Segun E.H. ora Polis a detene, e tabatin su cellular cune. El a bisa cu el a usa e cellular di su ruman muher algun biaha. Hues a mustra cu tin algun “chat” caminda E.H. ta bisa: “laga sa ruman”. Polis ta sospecha cu esaki ta relaciona cu e bendemento di un cadena di Lalo den exterior. Esey ta indica cu e ruman ta den exterior.
Hues a sigui bisa cu for di e “chat” por compronde cu E.H. lo a bisa, laga nan busca y kere cu ta ami a haci’e. E.H. a bisa Hues cu e no ta reconoce cu el a haci e “chat” ey.
Hues a puntra E.H. kico el a haci 19 Maart 2015. Segun E.H. e no ta corda mucho bon pero e tabata henter dia na cas. El a bisa cu e tabata bebe pero no ta corda mucho bon. Hues a puntra si el a papia cu P. Segun E.H. cu P. e tabata bebe na cas pero no ta corda.

NO TA PAPIA DI SU RUMAN HOMBER
El a bisa cu el a sali hunto cu U. bay na un Chines pa cumpra bebida alcoholico. Hues a mustra cu U. a declara cu nan a bay cumpra droga. Segun E.H. no ta berdad.
Hues a puntra si E.H. su ruman homber N., tabata hunto cun’e. El a bisa cu e no ta papia.
Hues a bisa cu segun declaracion di testigonan, e ruman homber N. tabata cun’e y despues di un rato a bay y no a mir’e mas. E.H. no a bisa nada.
Hues a puntra E.H. si e conoce Lisandro Webb. El a splica cu el a bay school cun’e y tabata sera cun’e den KIA pero despues no sa mas di dje. Hues a puntr’e si e sa di e problema entre gang. E.H. a bisa Hues cu e no ta den gang y no sa nada di gang. Hues a remarca cu Aruba ta chikito. E.H. a bisa cu e no ta anda den gang y no sa nada di gang di Madiki.

SET UP PA MATA
Segun E.H. e no sa di Lisandro Webb pasobra e tin añas sin papia cune. Hues a bisa cu Lisandro Webb lo tabata sinti su mes amenaza. E amiga di Lisandro a bisa cu 19 Maart 2016, Lisandro lo tabatin combersacion cu un tal N. y cu N. lo tabatin un arma y cu Lisandro lo mester a paga 5 mil florin pa e arma.
Hues a mustra cu segun e amiga, 2.30 di anochi, Lisandro a bis’e cu e ta bay Rooi Afo un rato. E tabatin casi 6 mil florin cun’e. Pero nunca Lisandro a bolbe. Segun Polis, N. ta ruman di E.H. pero N. no ta na Aruba, pues ta E.H., ta esun cu lo a traha e set up y el a tira Lisandro mata.
Hues a mustra cu Recherche a scucha un primo di Lisandro, L. kende a bisa cu un biaha Lisandro (Lalo) a buske na Februari 2015 y puntra si e por haya number di cellular di un persona pasobra e ta teme pa su bida. E tabata kier number di un persona cu ta sera den KIA y no e ruman homber cu ta scondi na Venezuela. Lisandro tabata kier a cumpra un arma. Esey ta nifica cu N. tabata na Venezuela y Lisandro a papia cu E.H. via L. pa cumpra un arma.
Hues a bisa cu Polis ta sospecha cu a kita e cadena cu Lisandro tabatin bisti y despues lo a busca manera pa bende. E.H. a bisa cu aña pasa el a declara cu su ruman homber a bin cu un cadena serca dje pero e no sa di kende e cadena ta. Hues a puntr’e con e cadena ta mustra. Segun E.H. e no ta corda pero ta un cadena di oro. E no por bisa si tabata un cadena cu diamante of cu otro cosnan ariba. E no kier a bisa nada mas kico su ruman lo kier a haci cu e cadena.
Hues a bisa cu Polis a saca afor cu a purba bende e cadena aki na un di e lugarnan cu ta cumpra oro.
Hues ta haya cu tur e cosnan aki ta mustra cu E.H. tin algo di haci cu e asunto di matamento di Lisandro Webb. E.H. ta para riba cu e no tin nada di haci.
Fiscal a mustra cu 19 Maart 2015, 6.30 di anochi lo tabatin combersacion entre E.H. y Baba Ras y cu Baba Ras lo tabatin placa p’e. E kier sa di kico e placa ta. E.H. a bisa cu e no sa kende ta Baba Ras.
Fiscal a mustra cu e amiga di Lalo Webb, T., lo a bisa cu e tabatin relacion cu E.H. despues cu Lalo a wordo mata. Segun E.H., T. ta gaña. El a bisa cu el a bay topa T. na Bright Bakery. Segun E.H. el a bay e panaderia y ta T. tabata den un Yaris blanco y no e manera T. ta pretende.
E no kier bisa nada di su relacion cu su ruman N.
Hues a mustra cu anterior E.H. a wordo condena pa atraco na 2 aña y 6 luna di prison y tambe despues el a wordo condena pa posecion di arma di candela.

EXIGENCIA DI FISCAL
Fiscal a bisa cu dia 20 Maart 2015 den oranan di anochi, un patruya di Polis a haya un Toyota Yaris blanco para banda di Indian Rock Garden. A haya un curpa sin bida. Pa 1.05 di anochi, dokter a constata morto. Investigacion a mustra cu e victima a sufri un tiro den cabez. A haya e victima cu algo mas di 5800 florin. A haci investigacion di biaha. 1.50 di merdia e amiga y un otro persona a reconoce e victima como Lalo.
Segun e amiga, Lalo tabatin contact cu N., cu lo tabata den poder di un arma di candela. N. a bisa Lalo pa bay serca dje y no a bisa ningun hende pasobra ningun hende sa cu e tabata na Aruba. Despues Lalo a bisa cu e ta bay serca N. na Rooi Afo. Mirando e cantidad di placa cu Lalo a bay cun’e, e amiga tabata sospecha cu Lalo lo bay cumpra arma for di N. Ta un tal L. for di KIA lo a drenta Lalo den contacto cu ruman homber di N. Tabatin tap entre N. y Lalo.
Segun Fiscal, dia 21 Maart 2015 a detene E.H. y a haci razia den e cas unda e ta biba na Meiveld y a confisca I-Phone. E momento ey un miembro di Recherche reconoce E.H. su stem den combersacion 19 Maart 2015. E ruman muher di E.H. a declara cu e sa fia su cellular na E.H. y N. El a bisa cu e ta corda 18 Maart 2015 el a laga su cel cas pasobra su yiu mester a wordo interna den hospital. Segun Fiscal, por bien ta cu a usa e cel di e ruman muher durante e periodo cu e tabata na hospital.
Fiscal a mustra cu promer E.H. a bisa cu ta su ruman N. a tira mata Lalo. Despues el a bisa cu e no ta declara mas y ta haci uso di su derecho di silencio. Hasta na Hues Comisario el a bisa cu ta N. a mata Lalo. E.H. no kier bisa nada mas.
Segun Fiscal, apesar cu tabatin orden pa observa N. for di October 2014, nunca a mira N. mas. Fiscal ta haya cu ta E.H. a yama Baba Ras y bisa cu “nos ta cla”. Ta E.H. a yama Baba Ras despues y bisa cu “a fix e”. Fiscal a sigui bisa cu E.H. mes a declara cu 19 Maart 2015 el a Sali un rato pa bay cumpra bebida.
For di tur investigacion, Fiscal ta conclui cu E.H. ta gaña. Aña pasa April 2015 a tuma DNA for di E.H. den KIA. A manda esaki Instituto Forence na Hulanda. Door cu e investigacion a tarda, a laga E.H. liber. Investigacion riba DNA ta mustra cu a haya E.H. su DNA na curpa di e victima. E momento ey E.H. tabata sera pa un otro caso y e interoga E.H. pero e no kier bisa nada con su DNA por a bay riba curpa di e victima.

KEDA SILENCIO TA DAÑA PA BO MES
Fiscal a bisa Hues cu ta un hecho cu E.H. por haci uso di derecho di silencio. Fiscal a mustra cu a base di sentencianan di Corte Supremo, mester mustra un sospechoso riba e consecuencianan di keda keto. Den caso asina por conclui cu ora tin indicacionnan fuerte, cu e silencio ta den contra di e sospechoso o sea por use den su culpabilidad.
Fiscal ta haya cu tin tur indicacion cu E.H. ta culpable. Tin un cantidad di tap cu ta mustra cu e tabata usa e cellular di N. cu a tira riba hende na October 2014. Tambe cu tabatin combersacionnan cu Baba Ras cu a keda condena 18 añadi prison pa a tira mata Brete. Tabatin combersacion tambe entre E.H. y su ruman N. riba bendemento di e cadena den exterior y cu e placa lo mester wordo parti den tres. Tabatin un mensahe pa E.H. cu ora e wordo deteni e mester bisa cu ta su ruman N. y no e.

CASTIGO
Fiscal a bisa cu Baba Ras y Lalo Webb tabatin problema cu otro y nan tabata tira riba otro. Tabatin diferente caso cu por confirma esaki. For di e caso aki, E.H. riba orden di Baba Ras sera den KIA, a tira mata Lalo. El a mustra riba castigo pa Baba Ras y Yellow pa a mata hende. Esakinan tabata casonan di accion di biaha.
Kere cu den e caso aki, tabatin planeamento pa basta tempo pa mata Lalo. El a bisa cu e ta tene na cuenta cu na 2011, E.H. a wordo condena pa atraco. Na 2014, E.H. a wordo condena pa arma di candela. Fiscal ta haya cu no por considera E.H. un first offender.
El a bisa Hues cu Corte Supremo a subi e castigo di asesinato di 20 pa 30 aña di prison. El a exigi 22 aña di prison pa E.H
Awor Hues ta bay studia e caso y dentro di algun siman lo por spera e sentencia.

Relato cortesia di Matutino Diario Aruba.