Durante decada, partido politico cu alternativamente (t)a forma Gobierno, a purba di empaketa e resultadonan di nan maneho lo mas atractivo posibel. Votador realmente mester a haya e impresion cu nan escogencia pa e partido (den Gobierno) tabata esun miho. Pesey tambe a mustra cu orguyo, hasta durante e tantisimo momentonan cu Gobierno tabata casi hoga financieramente, riba e hayasgo di e rapportnan di Fondo Monetario Interasional (FMI). Segun Armand Hessels di FGCA (Fundacion Gobernacion di Calidad Aruba), regularmente esakinan tabata mustra riba e bon prestacionnan di economia di Aruba. Pero na mesun momento a laga di menciona e advertencianan serio pa e situacion financiero y e causanan for di e mesun rapportnan. Esakinan lo tin consecuencia electoral negativo pa e partidonan envolvi. Pesey a neglisha nan.
E mesun tactica aki ta uza tambe den e campaña actual. Gobierno, hunto cu parlamentario fiel, ta bati su mes continuamente riba su pecho cu el a realisa un milager economico cu a salba Aruba for di un situacion di crisis. Pa demostra e ‘milager’ey, e ta haci uzo di un grafico cu mester demostra e resureccion di Aruba como resultado di e maneho di Gobierno di e ultimo 7 añanan.
Den esey e ta ‘lubida’ (concientemente?) cu e ‘milager’ ey ta limita severamente e posibilidadnan financiero di cada siguiente Gobierno durante e decadanan venidero mescos cu e perspectivanan economico di Aruba pa motibo di e aumento serio di e obligacionnan di pago di debe y interes. Ta asina cu e cantidad enorme di placa cu gabinete Mike Eman-1 a gasta den apenas 3,5 aña a redobla e debe di (2) biyones cu a acumula durante e 23 añanan anterior. Dentro di dos aña e situacion aki lo empeora seriamente pa motibo di e debenan adicional di mas of menos Afl. 1 biyon pa motibo di e proyectonan PPP. Pero… AVP no ta etala e grafico ey, ni tampoco e graficonan cu ta demostra e reduccion considerabel di e aporte di Gobierno pa fundacion, ni tampoco di e grafico cu ta mustra e aumento di e obligacionnan di interes cu actualmente ta suma na Afl. 230 pa aña. Esey ta mas cu henter e presupuesto di ministerio di Salubridad, esun di Husticia y casi mes hopi cu esun di Enseñansa.
Asina mes mester considera e grafico di AVP cu cierto desconfiansa. Pasobra e grafica aki ta presenta solamente e crecemento economico procentual durante di su gobernacion, compara cu esun di e ultimo gobernacion di MEP. Den esey no ta pone atencion na nivel di e GDP cu ta di mas importancia pa midi prosperidad di un pais. Manera por aprecia den e siguiente tabel cu cifra di Banco Central di Aruba, nunca a supera ni e GDP real ni esun nominal di 2008 den e añanan despues.
Ta mas importante ainda pa presenta e desaroyo di GDP pa persona. Asina ta bira cla si ta trata di un aumento of reduccion di productividad.
Pero ta di vital importancia pa mustra e (desaroyo di e) DEBE actual y futuro pa persona, ademas di e posibel consecuencianan pa ciudadano. Siguientemente mester compara nan cu situacion similar den nos regio, manera Puerto Rico. AVP lo presenta comunidad Arubano un imagen mas realistico, exponiendo e informacion aki tambe den grafico cla, hunto cu e medidanan concreto cu e ta pensa di tuma pa logra finansas publico duradero. Solamente asina por determina e futuro prosperidad di ciudadano Rubiano, cu nos partidonan politico aparentemente ta ansioso pa mehora.