Como preparacion pa e Weganan Sur Americano Hubenil 2017 cu lo tuma lugar dentro di algun luna na e ciudad Santiago capital di Chile, e federacion di taekwondo lo manda dos atleta prospecto competi den un campeonato di nivel halto na Costa Rica. E competencia di nuebe edicion di e Pan American Junior Kyorugi Championship na Costa Rica lo ta den e edad di 15 – 17 aña y ta pas perfectamente pa cu e preparacion pa e ODESUR Hubenil. E atletanan Chiara Petrocchi y Charrick Winterdaal ta esnan cu lo competi na Costa Rica mientras ambos lo wordo guia pa e coach nacional di taekwondo, Sr. Teofilo Rodriguez.
Aña pasa e atleta Chiara Petrocchi a logra medaya di plata pa Aruba den e categoria di Junior -46 kilo esaki den e Costa Rica Open G1. Aruba su Atleta Hubenil di Aña 2016 tin un bunita recuerdo pa loke ta su competencia na Costa Rica. Mescos cu Chiara e hoben Charrick Winterdaal tambe ta fuertemente prepara pa e competencia aki unda ambos atleta lo duna bon bataya contra di e miho taekwondistanan junior den henter nos continente Pan Americano. Tambe lo participa na e campo di entrenamento y competi na e Open di Costa Rica e atletanan Nasip Bislip y e atleta Angelo Rodriguez.
Un danki sigur na Lotto, e Loteria di Aruba pa medio di Comision di Subsidio cu a yuda subsidia e biahe di e atletanan Chiara Petrocchi y Charrick Winterdaal lo competi den e 9th Pan American Junior Kyorugi Championship na Costa Rica
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.