Diabierna anochi, e delegacion den e deporte di MuayThai boxing a regresa Aruba for di Hulanda. Dos siman atras e delegacion di Aruba a bringa den e di 15 edicion di e campeonato mundial di MauyThai na Thailand unda e atletanan Bruniel Kruythoff y Clayton Raven ta logra triunfa cu medaya di Brons den un competencia di nivel halto.
Den un combersacion sosteni cu e medayistanan Kruythoff y Raven nan ta conta nos cu e peleanan a bay miho cu nan mes a spera. Aunke cu esakinan tabata tras di otro nan a sa na duna bon bataya y demostra cu na Aruba tambe nos por bringa e deporte di arte marcial. Apesar cu mester a adapta na e orario di 11 ora di diferencia esaki no a stroba e dos pugilnan hoben di lucha pa un medaya. A lo largo tur dos a logra un di tres lugar pa Aruba.
Pa tanto Raven y Kruythoff e nivel tabata halto pero mirando e forma con nan a bringa esaki a cay den bista di promotornan na Thailand. Hasta a haya un invitacion pa regresa bek Thailand pa un otro torneo grandi. Awor tur dos lo concentra riba e Panamericano di MuayThai cual lo tuma lugar dentro di algun luna. Tur dos atleta lo kier prepara nan mes debidamente pa e competencia aki.
Lotto, e loteria di Aruba ta masha contento di por a brinda e oportunidad na nos atletanan di MuayThai boxing pa explora nan talento den un campeonato mundial den e deporte na un pais leu di Aruba. E experencia cu cada un di e atletanan a haya sigur ta uno grandi y no tin duda cu nan lo a sinja hopi di esaki. Bringa den un competencia na nivel mundial y logra conkista dos medaya di Brons ta bisa algo di e nivel di nos atletanan di Muaythai boxing. Lotto tey pa cambia bida di nos atletanan na nivel international. Lotto ta hopi orgulloso di e logro di e delegacion aki na Thailand. Un pabien grandi di Lotto na e atletanan Bruniel Kruythoff y Clayton Raven.