Riba e prome dia di trabou di e aña nobo, WEB Aruba tawatin e honor di ricibi e delegacion di miembronan di Eerste Kamer di Hulanda. ‘E encuentro cu e delegacion a bay hopi bon. Tawata interesante e comparacion di e situacion di utilidad na Hulanda y esun di un isla chikito manera Aruba.’, asina relacionista publico di WEB, Asja Dongen ta conta. ‘Pa WEB Aruba tawata un oportunidad unico pa por informa e representantenan di Eerste Kamer, di WEB su esfuersonan pa baha e dependiencia di combustibel y produci na un manera mihor pa medio ambiente, na beneficio di comunidad di Aruba.
E delegacion a haya un tour den plantanan di WEB, caminda nan a haya un impresion di e planta nobo di SWRO II. Despues a sigui pa e asina yama ‘controlekamers’ di e plantanan di awa y di e instalacionnan di motornan RECIPS. Eynan e delegacion a haya splicacion amplio di funcionamento di e sistemanan di produccion di awa y coriente nobo, compara cu e sistemanan tradicional.
E delegacion ta consisti di miembronan di comision fiho di Eerste Kamer pa lo cual ta trata relacionnan di Reino. E delegacion di Eerste Kamer tawata encabesa pa sra. Marijke Linthorst (PvdA) cu tawata presente hunto cu miembronan sr. Ben Swagerman (VVD), sra. Sophie van Bijsterveld (CDA), sr. Peter van Dijk (PVV), sra. Nanneke Quick-Schuijt (SP) y sr. Ruard Ganzevoort (GroenLinks). Nan tawata den compania di plaatsvervangend Griffier di Eerste Kamer, Sr. Fred Bergman y su asistente.
Pa motibo di tempo no tawata posibel pa duna un presentacion formal, pero a provee si na tur e miembronan, un PowerPoint Presentation cual ta duna un bista di e trabou cu WEB Aruba a bini ta haci y tambe di WEB su plannan pa futuro.
Loading ...
