Conferencia Permanente de Partidos Politicos De America Latina y del Caribe, COPPPAL ta reuni di 1 di December na Boneiro.
Presidente nobo di COPPPAL Manolo Pichardo lo bishita e isla y riba agenda tin e status politico di e pais y islanan den Reino Hulandes.
Pa Aruba partido MEP su delegacion ta consisti di Presidente Gerrit Croes, Secretario encarga cu Relacionnan Internacional Joe Koolman. Comisiarionan di Directiva di MEP Setty Christiaans Yarzagary y Mireille Sintjago.
Nan mision lo ta convence Copppal pa sostene nos – cu mas fervor – den nos caminda pa Nacionnan Uni den e lucha pa recobra nos autonomia. Tambe nan lo asisti na un conferencia di Nacionnan Uni organisa pa e fundacion “Nos kier Boneiro bek”.
Pa loke ta e punto di agenda “Status politico de Aruba”, aña pasa den asamblea general di COPPPAL na Sto Domingo lider di MEP Evelyn Wever-Croes a haci un presentacion den cual el a pidi COPPPAL sostene Aruba den e lucha pa recobra nos autonomia.
“Mi a splica extensamente di nos historia colonial, y e historia mas recien na momento cu nos a perde nos Corte di Husticia y ultimo e supervision financiero. Asamblea a pasa un resolucion cu Copppal ta bay crea un subcomision pa atende cu e tema aki.
Pero awe nos ta para un poco mas leu di nos meta danki na un gobierno iresponsabel y entreguista, y un pais Hulanda cu cada biaha ta abusa mas di e situacion di nos isla.
Mi ta referi na e forma con e nombracion di Gobernador a bay, cu ta di rechasa. Pa dos motibo:
1) Gobierno di Aruba no a trata e tema cu e atencion y respet debido y
2) E forma con Hulanda a abusa un biaha mas di e debilidad di gabinete Mike Eman tambe nos ta rechasa!
Den ningun pais den Reino esaki a pasa. Nos no a sostene Mike Eman den esaki, pasobra e no a carga su responsabilidad pa cu nombracion di Gobernador y ta e mes a busca e problema aki. Pero nos no ta aproba tampoco di e forma con Hulanda ta procede. Tur esaki ta los di e persona en cuestion.
Mi deseo lo ta pa na final di e conferencia na Boneiro Copppal reitera un biaha mas cu nos mester – awor cu mas fervor – cana e caminda hunto pa Comision di Decolonisacion di Nacionnan Uni, pa protehe nos pueblo di su propio Gobierno entreguista y di e Gobierno Hulandes cu ta probecha di esaki”, segun lider di MEP.