E atletanan Catherine Carraha, Robert Silba y Kevin Lugo ta tres top prospecto di Aruba den e deporte di karate. Diadomingo e tres atletanan aki a biaha pa Buenos Aires, Argentina unda na lo competi den e campeonato Panamericano di Karate 2017 den U21, Junior y Cadet. Esaki sin duda ta un di e competencianan di mas grandi di karate den nos continente unda e miho atletanan so lo ta presente. Pa Aruba Karate Bond y pa nos atletanan e ta importante mirando e campeonato mundial cu lo tuma lugar na Tenerife, Spaña y e Weganan Olimpico Hubenil di otro aña na e propio Buenos Aires, Argetina. Mester bisa cu e tres atletanan a prepara nan mes debidamente pa e competencia aki, mirando cu e atleta Catherine Carraha e ultimo luna aki a entrena y prepara na Medellin, Colombia. E atletanan Robert Silva y Kevin Lugo a entrena bou guia di Sensei Armando Pazos y guia local di Sensei Eduardo Macias ta den nan ultimo dianan di preparacion.
Den e ultimo tres añanan e deporte di karate a crece na Aruba mientras e interes cada bes ta keda subi. No por keda sin menciona cu den e region di Caribe ya caba nos karatekanan ta dunando resultado satisfactorio y ta logra medaya pa nos isla. Recientemente e delegacion di Karate a regresa super satisfactorio for di e Caribbean Karate Championship 2017 teni na Paramaribo, Surinam. E delegacion a logra no menos cu 9 medaya pa Aruba cual ta un tremendo logro sin duda algun.
Un danki sigur na Lotto, e Loteria di Aruba pa medio di Comision di Subsidio cu a subsidia e biahe di e delegacion di karate di Aruba cu lo ta presente pa e Panamericano di Karate 2017 na Buenos Aires, Argentina.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio