Den e di dos siman di December esta di 12 – 17 di december proximo, un delegacion den e deporte di boxeo bou guia di entrenador Jeffrey Nedd lo sali proximamente pa e pais Caribense di Sint Lucia unda nan lo competi den e asina yama Caribbean Boxing Development Tournament. Mester bisa cu na e torneo aki e miho boxdonan di e paisnan den Caribe cu ta papia ingles, frances y hulandes lo ta batayando fuertemente cu otro pa un puesto riba e podium.
Mas cu claro Aruba lo ta bon representa cu un atleta femenino y dos atleta masculino. E atletanan masculino lo ta Jeanmarc “Kokito” Howell kende sigur no ta un desconoci den e mundo di boxeo y arte martial. Tambe nos tin Brian Howell kende tambe tin un talento extraordinario sin laga afo e unico boxdo femenino den persona di Donalisa van der Biezen cu tambe a conoce un bon desaroyo boxistico. E tres boxdonan aki lo representa nos dushi isla di Aruba na Sint Lucia. Aserca nos mester remarka cu 1 di e boxdonan ta mayor di edad mientras e otro dosnan ta hubenil ainda. Tanto Jeanmarc Howell y Brian Howell ta forma parti di e team di Jefferson Boxing Gym mientras cu Donalisa v/d Biezen ta sali di e team di Leo’s boxing gym.
Un danki sigur na Lotto, e Loteria di Aruba pa medio di St. Sportsubasidie Aruba cu a subsidia e biahe di e delegacion di boxeo di Aruba pa e Caribbean Boxing Development Tournament na Sint Lucia.
Cumprando weganan di Lotto, e Loteria di Aruba bo ta contribui na deporte riba nos isla. E meta ta pa organisa loteria, cambia bida di su hungadonan y na mes momento inverti den deporte local pa medio di donacionnan na e St. Sportsubsidie Aruba.