Diasabra awor un delegacion femenino y masculino den e deporte di bowling lo sali pa e pais di Guatemala unda nan lo competi den e campeonato Centro Americano y del Caribe di bowling cual porcierto ta un torneo cu lo conta pa e clasificacion pa e Weganan CAC 2018 cu lo tuma luga otro aña na e ciudad di Baranquilla, Colombia. Mester bisa cu un total di 9 pais lo clasifica pa e weganan aki y Aruba sigur ta mey mey di e faboritonan pa logra e puesto aki. Mas cu claro Aruba lo ta bayendo cu su miho bolicheronan den ambos categoria pa asina nos dushi isla ta mas miho representa cu nunca.
E atletanan femenino cu lo representa Aruba ta Thashaina Seraus, Kamilah Dammers, Betiza Koolman, Shakaina Querrero, Giaira Arends y Jeadine Luidens. E delegacion masculino lo consisti di e atletanan Yannick Roos, Renald Thiel, Errol Brown, Jason Odor, Vale Jacobs y Oswald Dijkhoff.E staff di coaching di Aruba lo ta Alexander Biesum, Rita Lopez- Henriquez y Anthony Tjin Kon Fat.
Recientemente nos por a ripara cu nos atletanan di bowling ta presentando den bon forma y sacando cara di Aruba den exterior. E logronan historico di Thashaina Seraus cu a logra drenta pa hunga den e Profesional Women’s Bowling Association y e titulo di campeon conkista pa Elias Halabi den Youth Macao Open na China ta bisa hopi di e bon desaroyo di e deporte di bowling na Aruba.
Un danki sigur na Lotto, e Loteria di Aruba pa medio di Comision di Subsidio cu a subsidia e biahe di e delegacion di bowling pa e campeonato Centro Americano y del Caribe di bowling na Guatemala
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio